नवी दिल्ली: आगामी ‘रायझिंग स्टार्स महिला आशिया कप’साठी भारतीय क्रिकेट नियामक मंडळाने (BCCI) शनिवारी भारत ‘अ’ संघाची घोषणा केली आहे. अनुभवी अष्टपैलू खेळाडू राधा यादव हिच्या खांद्यावर संघाचे नेतृत्व सोपवण्यात आले असून, भारत आपले जेतेपद राखण्याच्या इराद्याने मैदानात उतरणार आहे.
पुढील महिन्यात ही स्पर्धा पार पडणार आहे. १३ फेब्रुवारी रोजी यूएई (UAE) विरुद्ध भारताचा पहिला सामना होणार आहे. यामध्ये भारत ‘अ’ संघाचा समावेश पाकिस्तान ‘अ’, नेपाळ आणि यूएई सोबत करण्यात आला आहे.
ही या स्पर्धेची दुसरी आवृत्ती आहे. तीन वर्षांपूर्वी हाँगकाँगमध्ये झालेल्या पहिल्या हंगामात भारतीय संघाने विजेतेपद पटकावले होते.
संघात दिया यादव आणि ममता एम यांची निवड झाली असली, तरी त्यांच्या सहभागावर बीसीसीआय सेंटर ऑफ एक्सलन्सच्या (BCCI Center of Excellence) अंतिम मंजुरीची प्रतीक्षा आहे.
रायझिंग स्टार्स महिला आशिया कप २०२६ साठी भारत अ संघ –
हुमैरा काझी, वृंदा दिनेश, अनुष्का शर्मा, दिया यादव, तेजल हसबनीस, नंदिनी कश्यप (विकेटकीपर), ममता एम (विकेटकीपर), राधा यादव (कर्णधार), सोनिया मेंधिया, मिन्नू मणी, तनुजा कंवर, प्रेमा रावत, साईमा ठाकोर, जिंतामणी कलिता, नंदिनी शर्मा.
रायझिंग स्टार्स महिला आशिया कप २०२६:
भारत अ वेळापत्रक
– १३ फेब्रुवारी (दुपारी २:०० वाजता): भारत अ विरुद्ध युएई अ
– १५ फेब्रुवारी (दुपारी २:०० वाजता): भारत अ विरुद्ध पाकिस्तान अ
– १७ फेब्रुवारी (सकाळी ९:३० वाजता): भारत अ विरुद्ध नेपाळ अ
– २० फेब्रुवारी (सकाळी ९:३० वाजता): उपांत्य फेरी १ (गट अ मधील अव्वल संघ विरुद्ध गट ब मधील दुसरा संघ)
– २० फेब्रुवारी (दुपारी २:०० वाजता): उपांत्य फेरी २ (गट ब मधील अव्वल संघ विरुद्ध गट अ मधील दुसरा संघ)
– २२ फेब्रुवारी: अंतिम फेरी
भारत या स्पर्धेत ‘डिफेंडिंग चॅम्पियन’ म्हणून उतरत आहे. राधा यादवचा अनुभव आणि युवा खेळाडूंची ऊर्जा यांच्या जोरावर भारत पुन्हा एकदा आशियावर आपले वर्चस्व गाजवण्यासाठी सज्ज आहे.
