Todays Gold Rate : इराण-अमेरिका तणावामुळे जागतिक बाजारात अनिश्चितता वाढली असून त्याचा थेट परिणाम सोने-चांदीच्या दरांवर दिसून येत आहे. युद्धाच्या पार्श्वभूमीवर काही दिवसांपूर्वी सोन्याच्या किमतीत मोठी वाढ झाली होती, मात्र नंतर अचानक घसरणही पाहायला मिळाली. 22 कॅरेट सोन्याचे दर एकवेळ 1.28 लाख रुपयांपर्यंत खाली आले होते.
दरम्यान, 6 एप्रिलपर्यंत कोणताही हल्ला होणार नसल्याचे अमेरिकेकडून स्पष्ट करण्यात आल्यानंतर बाजारात काही प्रमाणात स्थिरता आली. यामुळे पुन्हा एकदा सोन्याच्या दरांनी वरचा कल घेतला आहे. 27 मार्च 2026 रोजी एमसीएक्सवर सोन्याचा दर 1200 रुपयांनी वाढून प्रति 10 ग्रॅम 1,40,780 रुपयांवर पोहोचला. चांदीतही अशीच तेजी दिसून आली असून तिचा दर प्रति किलो 2,24,120 रुपयांवर गेला. (Todays Gold Rate)
मागील दिवशी दर घसरले असले तरी आज पुन्हा तेजीचे चित्र आहे. 26 मार्चला जीएसटीसह 10 ग्रॅम सोन्यासाठी सुमारे 1,47,290 रुपये मोजावे लागत होते, त्यानंतर पुन्हा वाढ नोंदवली गेली. काही दिवसांपूर्वी झालेल्या घसरणीमुळे सोन्याचे दर आणखी कमी होतील, असा अंदाज व्यक्त केला जात होता; मात्र प्रत्यक्षात बाजाराने उलट दिशा घेतली.
युद्धजन्य परिस्थितीमुळे शेअर बाजारावर दबाव दिसून येत असताना, गुंतवणूकदारांचा कल सुरक्षित गुंतवणुकीकडे विशेषतः सोने आणि चांदीकडे वळताना दिसतो आहे. त्यामुळेच या मौल्यवान धातूंच्या किमतीत चढ-उतार सुरू आहेत. (Todays Gold Rate)
तज्ज्ञांच्या मते, जर येत्या काळात तणाव कमी झाला किंवा युद्ध थांबले, तर सोन्याच्या दरात पुन्हा वाढ होण्याची शक्यता आहे. सध्या मात्र बाजारात अनिश्चिततेचे वातावरण कायम असल्याने दरांमध्ये अस्थिरता राहण्याची शक्यता नाकारता येत नाही.
