रायगड : रायगड जिल्ह्यातील रेवस-रेड्डी मार्गावर घडलेल्या भीषण अपघातात अलिबाग वनविभागातील वनरक्षक सुरज सारंगे यांचा मृत्यू झाला असून या घटनेने परिसरात हळहळ व्यक्त होत आहे. विशेष म्हणजे काही दिवसांपूर्वीच त्यांच्या घरी जुळ्या बाळांचे आगमन झाले होते आणि कुटुंबात आनंदाचे वातावरण असतानाच काही तासांतच दुर्दैवी घटना घडल्याने कुटुंबावर दुःखाचा डोंगर कोसळला.
मुरूड तालुक्यातील सर्वे गावचे रहिवासी असलेले सुरज सारंगे हे अलिबाग वनविभागाच्या तिनविरा येथे वनरक्षक म्हणून कार्यरत होते. शुक्रवारी (६ मार्च) रात्री उशिरा ते आपल्या दुचाकीवरून घरी जात असताना रेवस-रेड्डी मार्गावर सुरू असलेल्या कामादरम्यान खोदून ठेवलेल्या खोल मोरीत त्यांची दुचाकी अचानक कोसळली. या अपघातात त्यांना गंभीर दुखापत झाली आणि त्यांचा जागीच मृत्यू झाला.
शुक्रवारीच त्यांच्या जुळ्या बाळांना हॉस्पिटलमधून घरी आणण्यात आले होते. कुटुंबात नव्या पाहुण्यांच्या आगमनाचा आनंद साजरा होत असतानाच काही तासांतच झालेल्या अपघाताने संपूर्ण कुटुंब शोकसागरात बुडाले. सारंगे यांनी या आनंदाचा क्षण आपल्या मोबाईल स्टेटसवरही व्यक्त केला होता.
दरम्यान, रेवस-रेड्डी मार्गावर सुरू असलेल्या कामादरम्यान खोदलेल्या खड्ड्याभोवती कोणतीही सुरक्षाव्यवस्था नसल्याचा आरोप स्थानिकांकडून करण्यात येत आहे. त्या ठिकाणी बॅरिकेट्स, सूचना फलक, रेडियम पट्ट्या किंवा रात्री वाहनचालकांना दिसण्यासाठी लाल दिवे लावले नव्हते, अशी माहिती समोर येत आहे. या निष्काळजीपणामुळेच हा अपघात घडल्याचे सांगितले जात असून संबंधितांवर कारवाईची मागणी स्थानिकांकडून होत आहे. कर्तव्यदक्ष वनरक्षकाचा असा दुर्दैवी मृत्यू झाल्याने वनविभागातही शोककळा पसरली आहे.
