केरळ : केरळच्या राजकारणात मोठी खळबळ उडवणारी घटना आज पहाटे घडली. राज्याचे माजी मुख्यमंत्री पिनाराई विजयन यांच्या निवासस्थानी अंमलबजावणी संचालनालयाने (ED) अचानक छापा टाकत मोठी कारवाई सुरू केली. मुख्यमंत्रीपद गेल्यानंतर विजयन यांच्या अडचणीत वाढ झाल्याची चर्चा राजकीय वर्तुळात रंगू लागली आहे.
ईडीच्या अधिकाऱ्यांनी मनी लॉन्ड्रिंग प्रकरणात ही कारवाई केल्याची माहिती समोर आली आहे. तिरुवनंतपुरममधील विजयन यांच्या घरासह केरळभरात तब्बल 12 ठिकाणी एकाच वेळी छापेमारी करण्यात आली. यामध्ये त्यांच्याशी संबंधित काही कार्यालये आणि भाड्याने घेतलेल्या मालमत्तांचाही समावेश असल्याचे सांगितले जात आहे.
या धाडीनंतर केरळच्या राजकारणात आरोप-प्रत्यारोपांना सुरुवात झाली आहे. दुसरीकडे, ईडीकडून ही कारवाई आर्थिक गैरव्यवहाराच्या तपासाचा भाग असल्याचे स्पष्ट करण्यात आले आहे. ईडीच्या वरिष्ठ अधिकाऱ्यांनी दिलेल्या माहितीनुसार, ही संपूर्ण कारवाई कोचीन मिनरल्स अँड रुटाईल लिमिटेड (CMRL) प्रकरणाशी संबंधित आहे. या कंपनीकडून बनावट खर्च दाखवून काही प्रभावशाली व्यक्तींना मोठ्या प्रमाणात निधी वितरित करण्यात आल्याचा संशय तपास यंत्रणांना आहे.
या प्रकरणात माजी मुख्यमंत्री पिनाराई विजयन यांच्या कन्या वीणा विजयन यांचे नावही समोर आल्याने प्रकरण अधिकच चर्चेत आले आहे. वीणा विजयन यांच्याशी संबंधित कंपन्या आणि कार्यालयांवरही ईडीने छापेमारी केली. तिरुवनंतपुरम, कोच्ची आणि कन्नूर या शहरांमध्ये ही कारवाई सुरू असल्याने केरळच्या राजकारणात मोठी राजकीय उलथापालथ होण्याची शक्यता व्यक्त केली जात आहे.
