टोकियो: “डोरेमॉन… डोरेमॉन…” या गाण्याने जगभरातील कोट्यवधी मुलांचे बालपण रंगीबेरंगी करणाऱ्या अ‍ॅनिमेशन सृष्टीतील एका महान पर्वाचा अंत झाला आहे. ‘डोरेमॉन’ या अजरामर मालिकेचे दिग्दर्शक आणि जपानचे ‘राष्ट्रीय अ‍ॅनिमेशन जनक’ शिबायामा त्सुतोमू यांनी वयाच्या ८७ व्या वर्षी जगाचा निरोप घेतला. ६ मार्च २०२६ रोजी त्यांनी अखेरचा श्वास घेतला, मात्र त्यांच्या निधनाचे वृत्त १७ मार्च रोजी अधिकृतपणे समोर आले.
गेल्या काही काळापासून ते फुफ्फुसाच्या कर्करोगाशी (Lung Cancer) झुंज देत होते. त्यांच्या निधनाने केवळ जपानच नव्हे, तर भारतातील घराघरांत पोहोचलेला निळा-पांढरा रोबोटिक मांजर ‘डोरेमॉन’ आज खऱ्या अर्थाने पोरका झाला आहे. (Doremon Cartoon)
शिबायामा यांनी केवळ एक मालिका दिग्दर्शित केली नाही, तर त्यांनी कल्पनाशक्तीचे एक नवे विश्व उभे केले. १९७९ मध्ये सुरू झालेला ‘डोरेमॉन’चा प्रवास त्यांनी तब्बल २२ चित्रपटांपर्यंत यशस्वीपणे नेला. १९७८ मध्ये त्यांनी स्वतःचा ‘अजिया-दो अ‍ॅनिमेशन वर्क्स’ स्टुडिओ सुरू करून अ‍ॅनिमेशन क्षेत्रात क्रांती घडवली. नोबिताची निरागसता, शिजुकाची समजदारी, जियानची दादागिरी आणि सुनिओची हुशारी… या पात्रांच्या माध्यमातून शिबायामा यांनी मुलांवर मैत्री आणि संकटात एकमेकांना मदत करण्याचे संस्कार केले. ‘डोरेमॉन’च्या पिशवीतून निघणाऱ्या गॅझेट्सनी मुलांच्या कल्पनाशक्तीला पंख दिले. (Doremon Cartoon)
शिबायामा यांनी या फ्रँचायझीवर आधारित तब्बल २२ चित्रपट दिग्दर्शित करून या मालिकेची लोकप्रियता पिढ्यानपिढ्या टिकवून ठेवली. त्यांच्या महत्त्वपूर्ण योगदानामुळेच ‘डोरेमॉन’ आजही भारतातील प्रत्येक घरात तेवढ्याच उत्साहाने पाहिला जातो.
