पुणे : पुणे महानगर परिवहन महामंडळाने (पीएमपीएमएल) ‘डिजिटल पेमेंट्स’ला प्रोत्साहन देण्यासाठी बसमध्ये ऑनलाईन तिकीट काढण्याची सुविधा उपलब्ध करून दिली आहे. मात्र, ही सुविधा प्रवाशांसाठी सुविधेऐवजी डोकेदुखी ठरत असल्याचे चित्र सध्या दिसत आहे. ऑनलाईन पेमेंटच्या भरवशावर बसमध्ये चढणाऱ्या प्रवाशांना तांत्रिक बिघाड, स्कॅनिंगमधील त्रुटी आणि पैशांच्या फरकामुळे मोठ्या त्रासाला सामोरे जावे लागत आहे. (PMPML bus)
अनेक प्रवाशांनी तक्रार केली आहे की, मशीनवर स्कॅन करताना किंवा ऑनलाईन तिकीट काढताना प्रत्यक्ष भाड्यापेक्षा जास्त रक्कम स्क्रीनवर दाखवली जाते. यामुळे प्रवाशांना आर्थिक फटका बसत आहे. तसेच तांत्रिक बिघाडामुळे क्युआर कोड (QR Code) स्कॅन होत नाही. अशा वेळी नेटवर्क नसल्याचे कारण दिले जाते, ज्यामुळे ऑनलाईन पेमेंट करता येत नाही. ऑनलाईन पेमेंट चालत नसल्यामुळे बस वाहक (Conductor) प्रवाशांकडे रोख रकमेचा आग्रह धरतात. डिजिटल व्यवहारांच्या आशेने खिशात रोकड न ठेवणाऱ्या प्रवाशांची यामुळे मोठी गैरसोय होत आहे. (PMPML bus)
तिकीट मशीनमधील बिघाडामुळे प्रवाशांना बसमधून उतरवून देण्याचे किंवा त्यांच्याशी वाद घालण्याचे प्रकार घडत आहेत. यामुळे नागरिकांमध्ये प्रवास करताना अडचणीचा सामना करावा लागत आहे. आम्ही डिजिटल व्यवहाराला प्राधान्य देतो, पण जर बसमधील मशीन व्यवस्थित चालणार नसतील, तर आम्ही ऐनवेळी पैसे कोठून आणायचे? असा संतप्त सवाल प्रवाशांकडून विचारला जात आहे. पीएमपीएमएल प्रशासनाने या तांत्रिक त्रुटी तातडीने दूर कराव्यात आणि प्रवाशांना सुलभ सेवा द्यावी, अशी मागणी नागरिकांकडून केली जात आहे.
