नागपूर : धापेवाडा येथील सियान ॲग्रो इंडस्ट्रीज अँड इन्फ्रास्ट्रक्चर कंपनीमध्ये काम करताना जखमी झालेल्या कामगाराला तात्काळ वैद्यकीय मदत व कायदेशीर नुकसानभरपाई देण्याची मागणी वंचित बहुजन आघाडी प्रणित वंचित श्रमिक कामगार युनियनने केली आहे. यासंदर्भात कंपनीचे व्यवस्थापक काळे यांना निवेदन देण्यात आले.
केंद्रीय मंत्री नितीन गडकरी यांचे सुपुत्र निखिल गडकरी यांच्या मालकीची असल्याचे सांगण्यात आले आहे. या कंपनीत सिद्धार्थ देविदास गौरखेडे हे गेल्या पाच वर्षांपासून कार्यरत आहेत. 14 मे 2026 रोजी कंपनीत काम करत असताना त्यांच्या डाव्या पायावर 50 किलो वजनाची सोडा पावडरची पोती पडल्याने गंभीर अपघात झाला. या अपघातात त्यांच्या पायाचे हाड मोडल्याचे सांगण्यात आले.
वंचित श्रमिक कामगार युनियनच्या म्हणण्यानुसार, कंपनीकडून आवश्यक सुरक्षा साधने उपलब्ध करून देण्यात आली नसल्याने आणि व्यवस्थापनाच्या निष्काळजीपणामुळे हा अपघात घडला. तसेच अपघातानंतर कंपनीने जखमी कामगाराला कोणतीही आर्थिक किंवा वैद्यकीय मदत देण्यास नकार दिल्याचे सांगण्यात आले आहे.
या प्रकरणाची दखल घेत वंचित बहुजन आघाडीचे जिल्हाध्यक्ष अजय सहारे यांच्या मार्गदर्शनाखाली आणि वंचित श्रमिक कामगार युनियनचे अध्यक्ष प्रदीप काळे यांच्या नेतृत्वात कंपनी व्यवस्थापनाला निवेदन सादर करण्यात आले. निवेदनात कर्मचारी भरपाई कायदा, 1923 नुसार अपघातग्रस्त कामगाराला तात्काळ नुकसानभरपाई देणे, रुग्णालय, औषधोपचार व शस्त्रक्रियेचा संपूर्ण खर्च कंपनीने उचलणे तसेच अपघात झाल्यापासून कामगार पूर्णपणे बरा होऊन कामावर रुजू होईपर्यंतचा संपूर्ण पगार देण्याची मागणी करण्यात आली आहे.
दरम्यान, या मागण्या तीन दिवसांच्या आत पूर्ण न झाल्यास कंपनीच्या मुख्य प्रवेशद्वारासमोर बेमुदत आंदोलन छेडण्याचा इशाराही वंचित श्रमिक कामगार युनियनने दिला आहे. निवेदन देताना जिल्हा महासचिव सी. सी. वासे, कार्यालयीन सचिव वैभव येवले, आयटी सेल प्रमुख शुभम वाहने यांच्यासह पदाधिकारी उपस्थित होते.
