बीड : बीड येथील उमेश दळवी या मातंग समाजातील तरुणाच्या निर्घृण हत्येप्रकरणी वंचित बहुजन आघाडीने पीडित दळवी कुटुंबाची सांत्वनपर भेट घेतली. तसेच न्यायासाठी ठामपणे लढा देण्याची भूमिका जाहीर केली आहे. ॲड. बाळासाहेब आंबेडकर आणि युवा नेते सुजात आंबेडकर यांच्या निर्देशानुसार पक्षाच्या शिष्टमंडळाने दळवी कुटुंबाची भेट घेतली. मिळालेल्या माहितीनुसार, उमेश दळवी (रा. बीड) यांचा 24 मे 2026 रोजी तरुणाला बांधून अमानुष मारहाण करत खून करण्यात आल्याची धक्कादायक घटना घडली. या घटनेमुळे जिल्ह्यात संतापाची लाट उसळली असून समाजातील विविध स्तरांतून निषेध व्यक्त केला जात आहे.
पीडित कुटुंबीयांनी वंचित बहुजन आघाडीच्या शिष्टमंडळाला सांगितले की, पोलिसांनी फिर्याद नोंदवून घेतली नाही. तसेच या गुन्ह्यात सहभागी असलेल्या सर्व आरोपींची नावे एफआयआरमध्ये समाविष्ट करण्यात आलेली नाहीत. सध्या केवळ एका आरोपीचे नाव गुन्ह्यात नमूद करण्यात आले असून, शून्या शेख, पिल्लू शेख आणि पठाण शेरखान सत्तार यांना सहआरोपी करण्यात यावे, अशी कुटुंबाची मागणी आहे. यावेळी वंचित बहुजन आघाडीच्या पदाधिकाऱ्यांनी दळवी कुटुंबाला न्याय मिळवून देण्यासाठी पक्ष पूर्णपणे त्यांच्या पाठीशी असल्याचे आश्वासन दिले. उर्वरित आरोपींना सहआरोपी करण्यासाठी तसेच तपास निष्पक्षपणे व्हावा यासाठी लवकरच पोलीस आयुक्तांची भेट घेणार असल्याचेही त्यांनी सांगितले.
या शिष्टमंडळात सम्यकचे प्रदेश प्रवक्ते प्रशांत बोराडे, युवा जिल्हाध्यक्ष अनुरथ वीर, माजी तालुकाध्यक्ष किरण वाघमारे, गौतम बर्फे, धम्मपाल धूळधुळे यांच्यासह इतर पदाधिकारी उपस्थित होते. दरम्यान, या प्रकरणाचा सखोल तपास करून दोषींवर कठोर कारवाई करण्यात यावी आणि पीडित कुटुंबाला न्याय मिळावा, अशी मागणी वंचित बहुजन आघाडीकडून करण्यात आली आहे.
