ॲड. प्रकाश आंबेडकर : वंचित बहुजन आघाडी दिपके कुटुंबियांच्या सोबत ठामपणे उभी
पुणे : ‘कॉकरोच जनता पार्टी’ (CJP) चे संस्थापक अभिजीत दिपके आणि त्यांच्या कुटुंबियांना सोशल मीडियावरून जिवे मारण्याच्या धमक्या मिळाल्याने राज्यात खळबळ उडाली आहे. अज्ञात व्यक्तींनी दिलेल्या धमक्यांमध्ये, “ज्याप्रमाणे स्वयंपाकघरात रात्रीच्या वेळी झुरळे चिरडली जातात, त्याचप्रमाणे तुझी झुरळेही चिरडली जातील,” असा गंभीर इशारा देण्यात आल्याचे समोर आले आहे. या पार्श्वभूमीवर वंचित बहुजन आघाडीचे राष्ट्रीय अध्यक्ष ॲड प्रकाश आंबेडकर यांनी अभिजीत दिपके यांच्या कुटुंबीयांशी संपर्क साधत त्यांना धीर दिला आहे.
ॲड प्रकाश आंबेडकर म्हणाले की, “आज मी अभिजीत दिपके यांच्या वडिलांशी संवाद साधून त्यांच्या कुटुंबाची विचारपूस केली. अभिजीत आणि त्यांच्या कुटुंबाला जिवे मारण्याच्या धमक्या मिळत असून त्यामुळे कुटुंब प्रचंड मानसिक तणावाखाली आहे.” प्रकाश आंबेडकर यांनी या धमक्यांचा तीव्र निषेध नोंदवत म्हटले की, “अभिव्यक्ती स्वातंत्र्य आणि वैयक्तिक सुरक्षितता हे लोकशाहीचे मूलभूत स्तंभ आहेत. सेन्सॉरशिप आणि जिवे मारण्याच्या धमक्या या मुक्त संवाद आणि लोकशाही चर्चेला कमकुवत करणाऱ्या गोष्टी आहेत.”
तसेच, त्यांनी दिपके कुटुंबाला वंचित बहुजन आघाडी त्यांच्या पाठीशी ठामपणे उभी असल्याचा विश्वास दिला. “गरज पडल्यास आमची टीम राजकीय आणि प्रत्यक्ष पातळीवर त्यांना संरक्षण देईल,” असेही त्यांनी स्पष्ट केले.
दरम्यान, सोशल मीडियावरील या धमक्यांमुळे अभिव्यक्ती स्वातंत्र्य, वैचारिक मतभेद आणि सामाजिक माध्यमांवरील वाढत्या द्वेषपूर्ण वातावरणाचा प्रश्न पुन्हा एकदा ऐरणीवर आला आहे.
