औरंगाबाद: औरंगाबाद जिल्ह्यातील ग्रामीण पोलिसांच्या पिशोर पोलीस ठाण्याच्या पथकाने लालवण (ता. फुलंब्री) शिवारातील शेतात सुरू असलेल्या गांजाच्या बेकायदेशीर लागवडीचा पर्दाफाश केला आहे. ही कारवाई बुधवारी (दि. २८) करण्यात आली. यावेळी पोलिसांनी तब्बल ५२ लाख ९७ हजार ५०० रुपये मूल्याचा गांजा जप्त केला असून, या प्रकरणी एका ६६ वर्षीय शेकऱ्याला बेड्या ठोकल्या आहेत.
मिळालेल्या माहितीनुसार, पिशोर पोलीस ठाण्याच्या हद्दीतील लालवण येथील पाडळी एकफाटा परिसरातील शेत गट क्रमांक २८ मध्ये विनापरवाना गांजाची शेती फुलवली गेल्याची गोपनीय माहिती पोलिसांना मिळाली होती. या माहितीची खात्री पटवल्यानंतर पोलिसांच्या विशेष पथकाने संबंधित शेतात अचानक छापा टाकला.
या छाप्यादरम्यान चैनसिंग रतनसिंग बिमरोटे (वय ६६, रा. लालवण) याच्या शेतात कोणतीही कायदेशीर परवानगी किंवा परवाना नसताना केवळ आर्थिक फायद्यासाठी गांजाची व्यावसायिक प्रमाणावर लागवड केल्याचे उघडकीस आले. पंचांसमक्ष करण्यात आलेल्या मोजणीत एकूण १४१ गांजाची झाडे आढळली, ज्यांचे एकूण वजन १०५.१५ किलो भरले. या जप्त केलेल्या मुद्द्यामालाची बाजारातील अंदाजित किंमत ५२ लाख ९७ हजार ५०० रुपये आहे. या कारवाईमुळे ग्रामीण भागात खळबळ उडाली असून, अवैध गांजा लागवडीच्या या जाळ्यामागे आणखी कोणाचे हात आहेत का, याचा शोध पोलिसांकडून घेतला जात आहे.
आरोपी चैनसिंग बिमरोटे याच्याविरुद्ध अमली पदार्थ विरोधी कायद्यांतर्गत (NDPS Act) पिशोर पोलीस ठाण्यात गुन्हा दाखल करण्यात आला आहे. या प्रकरणाचा पुढील सखोल तपास सहायक पोलीस निरीक्षक कुणाल सूर्यवंशी करत आहेत.
