पंढरपूर : राज्यातील तमाम वंचित, शोषित आणि दुर्लक्षित घटकांना खऱ्या अर्थाने राजकीय प्रतिनिधित्व देण्याचे काम केवळ वंचित बहुजन आघाडीच करू शकते. दलित, आदिवासी, ओबीसी, मुस्लिम तसेच भटके-विमुक्त समाजातील नेतृत्वाला संधी देऊन त्यांच्या पाठीशी भक्कम राजकीय ताकद उभी करण्याचे ऐतिहासिक कार्य बाळासाहेब आंबेडकर करत आहेत, असे ठाम प्रतिपादन वंचित बहुजन आघाडीचे युवा नेते सुजात आंबेडकर यांनी केले.
पंढरपूर येथे वंचित बहुजन आघाडीच्या उमेदवारांच्या प्रचारार्थ आयोजित करण्यात आलेल्या भव्य जाहीर सभेत ते बोलत होते. यावेळी सभास्थळी मोठ्या संख्येने उपस्थित असलेल्या जनसमुदायाने सुजात आंबेडकरांच्या भाषणाला उत्स्फूर्त प्रतिसाद दिला. (Sujat Ambedkar)
सुजात आंबेडकर पुढे म्हणाले की, गेल्या अनेक दशकांपासून राज्यातील सत्ताधारी आणि प्रस्थापित राजकीय पक्षांनी वंचित समाजाच्या प्रश्नांकडे जाणीवपूर्वक दुर्लक्ष केले आहे. आता वेळ आली आहे की, आपण आपल्या हक्कासाठी लढणाऱ्या, आपल्या वेदना समजून घेणाऱ्या आणि आपल्या समाजातूनच पुढे आलेल्या प्रतिनिधींना सत्तेत पाठवले पाहिजे.
वंचित बहुजन आघाडी ही केवळ एक राजकीय पार्टी नसून ती सामाजिक परिवर्तनाची चळवळ आहे, असे सांगत सुजात आंबेडकरांनी मतदारांना संबोधित केले. (Sujat Ambedkar)
स्थानिक विकासाबाबत बोलताना त्यांनी सांगितले की, पंढरपूरसारख्या तीर्थक्षेत्र आणि सांस्कृतिकदृष्ट्या महत्त्वाच्या शहरात पायाभूत सुविधा, रोजगार निर्मिती, शेतकरी प्रश्न आणि तरुणांच्या भविष्याबाबत गंभीर विचार होणे आवश्यक आहे. हे प्रश्न सोडवण्यासाठी प्रस्थापित पक्षांकडे इच्छाशक्ती नसून, वंचित बहुजन आघाडीच सर्वसामान्यांच्या प्रश्नांना प्राधान्य देणारी राजकीय शक्ती आहे, असा विश्वास त्यांनी व्यक्त केला. (Sujat Ambedkar)
या जाहीर सभेला वंचित बहुजन युवा आघाडीचे औरंगाबाद जिल्हाध्यक्ष सतीश गायकवाड यांच्यासह पक्षाचे अनेक वरिष्ठ पदाधिकारी, स्थानिक नेते आणि कार्यकर्ते मोठ्या संख्येने उपस्थित होते. सभास्थळी ‘वंचित बहुजन आघाडीचा विजय असो’, ‘शोषित-वंचितांचा आवाज – वंचित बहुजन आघाडी’ अशा जोरदार घोषणांनी संपूर्ण परिसर दणाणून गेला होता.
