महापे, नवी मुंबई : दिवाळीचा सण आनंदात साजरा करण्यासाठी प्रत्येक कुटुंबाची आर्थिक तयारी सुरू असतानाच, महापे MIDC येथील इंजिनएक्स कंपनीतील ४० हून अधिक कामगारांवर मात्र आर्थिक संकट ओढवले आहे. कंपनीकडून पगार थकीत असल्याने या कामगारांना सणाच्या काळात आर्थिक अडचणींचा सामना करावा लागत आहे. आपल्या हक्काचे वेतन मिळावे आणि न्याय मिळावा, यासाठी संबंधित कामगारांनी वंचित बहुजन आघाडीकडे धाव घेतली आहे.
कामगारांनी केलेल्या या मागणीची दखल घेत वंचित बहुजन आघाडीने त्यांच्या पाठीशी उभे राहत थकीत पगार तातडीने देण्याची मागणी केली आहे. कामगार आपल्या कष्टाच्या जोरावर कंपनीसाठी काम करतात. त्यामुळे त्यांनी केलेल्या कामाचा मोबदला वेळेवर मिळणे आवश्यक आहे. मात्र, दिवाळीसारख्या महत्त्वाच्या सणाच्या काळातही पगार थकीत राहिल्याने कामगारांसमोर घरखर्च, सणाची तयारी आणि इतर आर्थिक गरजा पूर्ण करण्याचा प्रश्न निर्माण झाला आहे.
Also Read : अरुणाचल सीमेवर भारत-चीन सैन्यामध्ये चकमक सुरूच; आयटीबीपीच्या महासंचालकांचा खुलासा
वंचित बहुजन आघाडीने संबंधित इंजिनएक्स कंपनीने कामगारांचे सर्व थकीत पगार तातडीने अदा करावेत, अशी मागणी केली आहे. कंपनी व्यवस्थापनाने कामगारांच्या वेतनाचा प्रश्न त्वरित मार्गी लावून त्यांना दिलासा द्यावा. तसेच, कंपनीकडून कामगारांच्या प्रश्नाकडे दुर्लक्ष केले जात असल्यास संबंधित प्रशासनाने या प्रकरणात तातडीने हस्तक्षेप करावा, कामगारांना त्यांचे हक्काचे वेतन मिळवून द्यावे आणि जबाबदार कंपनीवर योग्य ती कारवाई करावी, अशी भूमिका वंचित बहुजन आघाडीने मांडली. प्रशासनाने या प्रकरणाची गांभीर्याने दखल घेऊन कामगारांना तातडीने न्याय मिळवून द्यावा, अशी मागणी वंचित बहुजन आघाडीच्या वतीने करण्यात आली.
यावेळी वंचित बहुजन आघाडीचे जिल्हाध्यक्ष अश्वजीत जगताप, महासचिव मल्लिनाथ सोनकांबळे, राजेश भालेराव, गौतम सपकाळे, मुकेश बोधडे, संजय गायकवाड यांच्यासह पक्षाचे पदाधिकारी, कार्यकर्ते आणि इंजिनएक्स कंपनीतील ४० हून अधिक कामगार उपस्थित होते.
