जालना : परमेश्वर हिवाळे यांना बजरंग दलाच्या कार्यकर्त्यांनी गोरक्षेच्या नावाखाली २३ मे २०२६ रोजी कैन्हानगर, जालना येथे अमानुषपणे शेण चारून, जातीवाचक शिवीगाळ व मारहाण केल्याचा आरोप आहे. या घटनेचा व्हिडिओ सोशल मीडियावर प्रसारित करून हिवाळे यांची बदनामी केल्याप्रकरणी २१ ऑगस्ट २०२६ रोजी तालुका पोलीस ठाण्यात गुन्हा दाखल करण्यात आला आहे.
या पार्श्वभूमीवर वंचित बहुजन आघाडीचे राज्य कार्यकारिणी सदस्य दिपक डोके यांनी ३० ऑगस्ट रोजी नूतन वसाहत, जालना येथे हिवाळे यांच्या निवासस्थानी भेट देऊन पीडित कुटुंबीयांची विचारपूस केली. वंचित बहुजन आघाडी पीडित हिवाळे कुटुंबाच्या पाठीशी खंबीरपणे उभी राहणार असून, बजरंग दलाच्या संबंधित आरोपींवर कायदेशीर कारवाई होईपर्यंत पाठपुरावा केला जाईल, असे डोके यांनी स्पष्ट केले.
दरम्यान, बजरंग दलाच्या संबंधित कार्यकर्त्यांना तातडीने अटक करण्याच्या मागणीसाठी दिपक डोके यांनी जालना पोलीस अधीक्षक तेघबीर सिंह संधू यांच्याशी दूरध्वनीवरून संपर्क साधला. यावेळी संबंधित आरोपींना दोन दिवसांत अटक केली जाईल, असे पोलीस अधीक्षकांनी कळविल्याची माहिती डोके यांनी दिली.
जातीय अत्याचाराच्या प्रकरणात पीडितांना न्याय मिळवून देण्यासाठी वंचित बहुजन आघाडी संघर्ष करणार असल्याचेही डोके यांनी सांगितले. यावेळी कामगार आघाडीचे जिल्हाध्यक्ष प्रकाश पाखरे, सम्यक विद्यार्थी आंदोलनाचे जिल्हाध्यक्ष सुरज सोनवणे, विलास भिंगारे आदी उपस्थित होते.
