हिंगोली : वसमत तालुक्यातील बाभुळगाव सर्कल अंतर्गत येत असलेल्या मुडी येथील जिल्हा परिषद प्राथमिक शाळेच्या शालेय व्यवस्थापन समितीची निवडणूक नुकतीच उत्साहात पार पडली. या निवडणुकीत वंचित बहुजन आघाडीच्या चित्रकला सिद्धार्थ करवंदे यांची बहुमताने अध्यक्षपदी निवड करण्यात आली आहे, तर उपाध्यक्षपदी मनिषा कैलास पडोळे यांची वर्णी लागली आहे.
शाळेतील सर्व माता-पालक सदस्यांची निवड झाल्यानंतर, नवनियुक्त सदस्यांमधून अध्यक्ष व उपाध्यक्ष निवडीची प्रक्रिया राबवण्यात आली. यामध्ये चित्रकला करवंदे यांच्या नावावर बहुमताने शिक्कामोर्तब करण्यात आले. मुख्याध्यापिका अवचार आणि कदम यांनी या संपूर्ण निवडणूक प्रक्रियेचे नियोजन अत्यंत सुरळीतपणे पार पाडले. (Vanchit bahujan aghadi)
या निवडीच्या वेळी मुडी गावातील नागरिक मोठ्या संख्येने उपस्थित होते. लोकशाही मार्गाने पार पडलेल्या या निवडीत कोणताही कायदा व सुव्यवस्थेचा प्रश्न निर्माण होऊ नये, यासाठी वसमत ग्रामीण पोलीस स्टेशनचे बीट जमादार उपरे आणि बेंगाळ यांनी चोख बंदोबस्त ठेवला होता.
निवड प्रक्रिया पूर्ण झाल्यानंतर शाळेच्या वतीने व गावकऱ्यांच्या वतीने माजी शालेय व्यवस्थापन समितीचा निरोप समारंभ व सत्कार करण्यात आला. तसेच नवनिर्वाचित अध्यक्षा, उपाध्यक्षा व सदस्यांचा यथोचित सत्कार करण्यात आला.
