ठाणे : अमली पदार्थांच्या तस्करांच्या एका मोठ्या टोळीचा पर्दाफाश ठाणे गुन्हे शाखेच्या अमली पदार्थ विरोधी पथकाने केला आहे. यावेळी. तस्कार्यांकडून सुमारे १ किलो ७१ ग्रॅम वजनाचा आणि २ कोटी २४ लाख रुपयांपेक्षा अधिक किमतीचा ‘एमडी’ ड्रग्ज जप्त करण्यात आला. या घटनेप्रकरणी मध्य प्रदेशातील चार तस्करांना अटक करण्यात आली आहे.
गुन्हे शाखेचे पोलीस उपायुक्त अमरसिंह जाधव यांनी दिलेल्या माहितीनुसार, ३ नोव्हेंबर रोजी ठाण्यातील नौपाडा परिसरात एक परप्रांतीय टोळी ड्रग्ज विक्रीसाठी येणार असल्याची गुप्त माहिती अमली पदार्थ विरोधी पथकाला मिळाली होती.
या माहितीनुसार, पथकाने नौपाडा येथील एमटीएनएल कार्यालयासमोर कौशल्यपूर्ण सापळा रचला. ताबडतोब, एका चारचाकी वाहनातून आलेल्या चार संशयितांना ताब्यात घेण्यात आले.
या चौघांनी विक्रीसाठी आणलेला १ किलो ७१ ग्रॅम ६ मिलीग्रॅम एमडी ड्रग्ज आणि ड्रग्ज वाहतुकीसाठी वापरलेले चारचाकी वाहन असा एकूण २ कोटी २४ लाख ७५ हजार ५०० रुपये किमतीचा मुद्देमाल जप्त करण्यात आला.
अटक करण्यात आलेले सर्व आरोपी हे मध्य प्रदेशातील रहिवासी आहेत. त्यांनी परराज्यातून तस्करी करून हा मोठा ड्रग्ज साठा ठाण्यात आणला होता. नौपाडा पोलीस ठाण्यात या टोळीविरुद्ध गुन्हा दाखल करण्यात आला आहे.
या घटनेचे आरोपी इम्रान उर्फ बब्बु खिजहार खान (वय ३७), वकास अब्दुलरब खान (वय ३०), ताकुद्दीन रफीक खान (वय ३०), कमलेश अजय चौहान (वय २३) असे आरोपींचे नाव आहे. या चारही आरोपींपैकी इम्रान खान आणि कमलेश चौहान हे दोघे अट्टल गुन्हेगार असून, त्यांच्यावर मध्य प्रदेश राज्यात यापूर्वीही अनेक गंभीर गुन्हे दाखल असल्याची माहिती पोलिसांनी दिली आहे. या घटनेची पुढील तपास पोलिस करत आहे.
