अकोला : आगामी तेल्हारा नगर परिषद निवडणुकीच्या पार्श्वभूमीवर वंचित बहुजन आघाडी, शेतकरी पॅनल आणि तेल्हारा विकास मंच यांच्या अधिकृत उमेदवारांच्या प्रचारार्थ वंचित बहुजन आघाडीचे युवा नेते सुजात आंबेडकर यांची तेल्हारा येथे जाहीर सभा उत्साहात पार पडली. यावेळी उपस्थितांना नगराध्यक्ष पदाच्या उमेदवार विद्या शामस्कर आणि सर्व नगरसेवक पदाच्या उमेदवारांना मतदान करण्याचे आवाहन करण्यात आले.
सभेला मोठ्या संख्येने नागरिकांनी उपस्थिती दर्शविली. यावेळी बोलताना सुजात आंबेडकर यांनी तेल्हारा शहराचा स्थानिक विकास, रोजगार, आरोग्य आणि शिक्षण या मूलभूत प्रश्नांवर वंचित बहुजन आघाडी विशेष लक्ष केंद्रित करून काम करणार असल्याचे आश्वासन दिले.
तेल्हारा शहराला विकासाच्या मार्गावर नेण्यासाठी वंचित बहुजन आघाडी कटिबद्ध असून, नागरिकांनी पक्षाच्या उमेदवारांना निवडून देण्याचे आवाहन त्यांनी केले.
यावेळी सभेला उपस्थित असलेल्या जनतेने वंचित बहुजन आघाडीच्या नगराध्यक्ष उमेदवारासह सर्व नगरसेवक उमेदवारांना मोठ्या मताधिक्याने निवडून आणणार असल्याचा विश्वास व्यक्त केला.
या जाहीर सभेला वंचित बहुजन आघाडीचे तेल्हारा तालुका अध्यक्ष अशोक दारोकार, तसेच पक्षाचे अनेक पदाधिकारी आणि कार्यकर्ते मोठ्या संख्येने उपस्थित होते.
