शेवगाव : बोधेगाव येथील सामाजिक कार्यकर्ते बन्नूभाई शेख, धोंडिराम मासाळकर, सादिक पठाण आणि अफसर शेख यांनी रविवार, दि. ९ ऑगस्ट २०२६ रोजी शेवगाव येथील विश्रामगृहात वंचित बहुजन आघाडीमध्ये जाहीर प्रवेश केला. यावेळी काही कार्यकर्त्यांनी पक्षात ‘घरवापसी’ केली.
वंचित बहुजन आघाडीचे राष्ट्रीय सदस्य प्रा. किसन चव्हाण यांच्या प्रमुख उपस्थितीत हा पक्षप्रवेश कार्यक्रम पार पडला. यावेळी जिल्हा उपाध्यक्ष शाहुराव खंडागळे, कल्याणराव भागवत पाटील, तालुकाध्यक्ष शेख प्यारेलालभाई, उपाध्यक्ष अरुण झांबरे पाटील, विशाल इंगळे, युवा तालुका उपाध्यक्ष सागर गरुड, विष्णु वीर, रज्जाक सैय्यद, दिलीप वाघमारे, ज्येष्ठ मार्गदर्शक हाजी मुसाभाई, राजूशेठ आहुजा यांच्यासह सामाजिक कार्यकर्ते, पदाधिकारी आणि पक्षाचे कार्यकर्ते मोठ्या संख्येने उपस्थित होते.
यावेळी मार्गदर्शन करताना प्रा. किसन चव्हाण म्हणाले, “वंचित बहुजन आघाडीमध्ये कार्यकर्ता म्हणून काम करणाऱ्यांना सर्वाधिक महत्त्व दिले जाते. इतर पक्षांमध्ये कार्यकर्त्यांचा केवळ वापर केला जातो; मात्र वंचित बहुजन आघाडीकडे सत्ता किंवा पैसा नसला तरी कार्यकर्त्यांना मान-सन्मान आणि सामाजिक प्रतिष्ठा दिली जाते.”
कार्यकर्ता हा पक्षाचा कणा असल्याचे सांगत चव्हाण म्हणाले की, कार्यकर्त्यांना काम करण्याचे पूर्ण स्वातंत्र्य दिले जाते. त्यामुळे प्रत्येक कार्यकर्त्याने सामाजिक भान ठेवून निष्ठेने आणि प्रामाणिकपणे काम करावे. भविष्यात महाराष्ट्राच्या राजकारणात वंचित बहुजन आघाडी ही निर्णायक राजकीय शक्ती म्हणून पुढे येईल. आजही विरोधी पक्षाची भूमिका वंचित बहुजन आघाडी प्रभावीपणे बजावत असून शेतकरी, विद्यार्थी, कामगार, बेरोजगार, महिला तसेच भ्रष्टाचाराच्या प्रश्नांवर सरकारला जाब विचारण्याचे काम पक्षाकडून केले जात असल्याचे त्यांनी सांगितले.
यावेळी वंचित बहुजन आघाडीचे जिल्हा उपाध्यक्ष कल्याणराव भागवत पाटील, तालुकाध्यक्ष शेख प्यारेलाल, उपाध्यक्ष अरुण झांबरे पाटील आणि युवा तालुका उपाध्यक्ष सागर गरुड यांनीही आपले मनोगत व्यक्त केले. कार्यक्रमाचे प्रास्ताविक जिल्हा उपाध्यक्ष शाहुराव खंडागळे यांनी केले, तर उपस्थितांचे आभार सुरेश खंडागळे यांनी मानले.
