बुलढाणा: शाळा आणि महाविद्यालयांच्या परिसरात सर्रास होणारी अवैध गुटखा विक्री, जीवघेणी वाळू वाहतूक आणि वाढती दारू विक्री यामुळे तालुक्यातील तरुण पिढी बरबाद होत आहे. या गंभीर प्रश्नावर प्रशासनाने तातडीने पावले उचलावीत, या मागणीसाठी वंचित बहुजन आघाडीने आक्रमक भूमिका घेतली आहे.
तालुक्यातील परिस्थितीकडे लक्ष वेधण्यासाठी वंचित बहुजन आघाडीच्या वतीने तहसीलदारामार्फत जिल्हाधिकारी व जिल्हा पोलिस अधीक्षकांना लेखी निवेदन देण्यात आले. अवैध व्यवसायांमुळे विद्यार्थ्यांमध्ये व्यसनाधीनता वाढत आहे, तर भरधाव वाळू वाहतुकीमुळे अपघातांचे सत्र सुरू आहे, अशी चिंता तालुकाध्यक्ष प्रवीण विरघट यांनी यावेळी व्यक्त केली. प्रशासनाला १५ दिवसांची मुदत देण्यात आली असून, कारवाई न झाल्यास तीव्र जनआंदोलन छेडण्याचा इशाराही त्यांनी दिला आहे.
याप्रसंगी विनोद सावदेकर, कैलास दाभाडे, पंडित परघरमोर यांच्यासह आघाडीचे अनेक पदाधिकारी व कार्यकर्ते मोठ्या संख्येने उपस्थित होते.
