पुणे : जुन्नर तालुक्यातील प्रसिद्ध रिव्हर्स वॉटरफॉल परिसरात एक धक्कादायक घटना उघडकीस आली आहे. श्रीगोंद्याचे तलाठी आणि एक कॉलेज तरुणी यांचे मृतदेह आढळून आल्याने परिसरात खळबळ उडाली आहे. मृत व्यक्तींची ओळख पटली असून, तलाठी श्रीगोंद्याचे असून तरुणी पुण्यातील एका खाजगी कॉलेजची विद्यार्थिनी असल्याचे समजते.
ही घटना रविवारी (ता. २२ जून) घडली असून, स्थानिक नागरिकांच्या निदर्शनास आल्यावर पोलिसांना माहिती देण्यात आली. वॉटरफॉलजवळ दोघांची चपलेची जोडी व इतर वस्तू आढळल्याने पोलिसांनी शोधमोहीम राबवून दोघांचे मृतदेह पाण्यातून बाहेर काढले.
सदर प्रकरण आत्महत्या आहे की इतर कोणते गुन्हेगारी कारण आहे, याचा तपास सुरू असून, पोलिसांनी दोघांचे मोबाईल, सोशल मीडियातील संवाद आणि कॉल डिटेल्स तपासण्यास सुरुवात केली आहे.
या घटनेमुळे परिसरात भीतीचे वातावरण निर्माण झाले असून, दोघांच्या कुटुंबीयांना पोलिसांनी विचारणा सुरू केली आहे. मृत्यूचे नेमके कारण काय, हे शवविच्छेदन अहवाल आल्यानंतर स्पष्ट होईल, असे पोलिसांकडून सांगण्यात येत आहे.
