पुणे : शहरात कायदा व सुव्यवस्थेचे अक्षरशः वाभाडे काढणारी एक धक्कादायक घटना कात्रज परिसरात समोर आली आहे. कात्रज चौक ते नवले ब्रिज या हायवेवरील राजमाता भुयारी मार्ग, दत्तनगर चौक येथे भरदिवसा एका रिक्षाचालकावर धारदार हत्याराने जीवघेणा हल्ला करण्यात आला. ही घटना १८ मे २०२६ रोजी सकाळी सुमारे १०:१५ वाजण्याच्या सुमारास घडली असून, सुरज माणिक काळे (वय ३०, रा. कात्रज, पुणे) असे जखमी रिक्षाचालकाचे नाव आहे.
या प्रकरणी आंबेगाव पोलीस ठाण्यात गुन्हा दाखल करण्यात आला असून पोलिसांनी तातडीने कारवाई करत हल्ल्यात सहभागी असलेल्या तिन्ही आरोपी रिक्षाचालकांना ताब्यात घेतले आहे. पोलीस तपासात समोर आलेल्या माहितीनुसार, सुरज काळे आणि आरोपी यांच्यात दोन ते तीन वर्षांपूर्वी प्रवासी भरण्याच्या कारणावरून मोठा वाद झाला होता. याच जुन्या भांडणाचा राग मनात धरून आरोपींनी सुरज काळे यांना दत्तनगर चौकासारख्या गजबजलेल्या परिसरात गाठले. त्यानंतर धारदार हत्याराने त्यांच्यावर थेट वार करण्यात आले.
अचानक झालेल्या या हल्ल्यामुळे परिसरात मोठी खळबळ उडाली होती. हल्ल्यात गंभीर जखमी झालेल्या सुरज काळे यांच्यावर सध्या रुग्णालयात उपचार सुरू आहेत. डॉक्टरांनी दिलेल्या माहितीनुसार, त्यांची प्रकृती स्थिर असून उपचारांना प्रतिसाद मिळत आहे. दरम्यान, भरदिवसा घडलेल्या या घटनेमुळे पुण्यातील कायदा व सुव्यवस्थेचा प्रश्न पुन्हा एकदा ऐरणीवर आला आहे.
गजबजलेल्या चौकात अशा प्रकारे धारदार हत्याराने हल्ला होत असल्याने नागरिकांमध्ये भीतीचे वातावरण निर्माण झाले आहे. आंबेगाव पोलिसांकडून पुढील तपास सुरू आहे.
