पुणे : कोथरूड पोलिसांनी मारहाण केल्याचा आणि जातीवाचक शिवीगाळ केल्याचा आरोप करणाऱ्या तीन मुली आणि त्यांना मदत करणाऱ्या श्वेता पाटील व अन्य एका व्यक्तीसह एकूण पाच जणांवर पुणे पोलिसांनी गुन्हा दाखल करण्यात आला आहे. सरकारी कामात अडथळा आणल्याचा आरोप त्यांच्यावर केला आहे.
पोलिसांनी या प्रकरणाची चौकशी केली असता, त्यांना कोणतीही ठोस माहिती मिळाली नाही. पोलिसांनी संपूर्ण घटना पोलीस स्टेशनच्या आत (इंडोर) घडल्याचे एक पत्र आंदोलकांना दिले. मात्र, श्वेता पाटील यांनी हे पत्र पोलिसांसमोरच फाडून टाकले.
याशिवाय, ज्या मुलींनी मारहाणीचा आरोप केला होता, त्यांचा वैद्यकीय तपासणी अहवाल देखील समोर आला. या अहवालात मारहाणीच्या कोणत्याही ताज्या जखमा किंवा व्रण नसल्याचे समोर आले. या सगळ्या प्रकरणानंतर पाच जणांवर गुन्हा दाखल करण्यात आला आहे.
पुणे पोलिसांनी बंडगार्डन पोलीस ठाण्यात पाच जणांविरुद्ध सरकारी कामात अडथळा आणल्याप्रकरणी कलम 132 अंतर्गत गुन्हा दाखल केला. आंदोलन करत असताना यामध्ये तीन पीडित मुली, श्वेता पाटील आणि अन्य एका व्यक्तीचा समावेश आहे. तसेच आमदार रोहित पवार, सामाजिक कार्यकर्त्या अंजली आंबेडकर आणि सुजात आंबेडकर हे देखील उपस्थित होते, मात्र त्यांच्यावर कोणताही गुन्हा दाखल करण्यात आलेला नाही.
काय आहे प्रकरण?
1 ऑगस्ट रोजी, तीन मुलींनी कोथरूड पोलिसांवर मारहाण आणि जातीवाचक शिवीगाळ केल्याचा आरोप केला होता. पोलिसांनी तपास करताना “तुम्ही महारा-मांगाच्या पोरी आहात”, “किती मुलांसोबत झोपल्या आहात”, “तुम्ही लेस्बियन आहात का?” असे प्रश्न विचारल्याचा आरोप या मुलींनी केला होता.
या आरोपांनंतर, या मुली आणि त्यांचे सहकारी आक्रमक झाले. त्यांनी कोथरूड पोलिसांविरुद्ध अॅट्रॉसिटीचा गुन्हा दाखल करण्याची मागणी करत 3 ऑगस्ट रोजी सकाळी 10 वाजल्यापासून रात्री 3 वाजेपर्यंत पुणे पोलीस आयुक्तालयाबाहेर ठिय्या आंदोलन केले. यामध्ये त्यांना श्वेता पाटील, परिक्रमा खोत, अंजली आंबेडकर, सुजात आंबेडकर आणि इतर 50 ते 60 सहकाऱ्यांनी पाठिंबा दिला.
