परभणी : परभणी तालुक्यातील पेडगाव येथे बाजाराच्या दिवशी दुकानासमोर ऑटो लावण्याच्या कारणावरून भाजी विक्रेते विजय खरात (वय २२) यांना चौघांनी जबर मारहाण केल्याची घटना घडली. या मारहाणीत त्यांना दुखापत झाली असून, त्यांच्यावर परभणी येथील जिल्हा सामान्य रुग्णालयात उपचार सुरू आहेत. मारहाणीदरम्यान जातीवाचक शिवीगाळ केल्याचेही पीडिताने सांगितले.
दरम्यान, उपचारासाठी रुग्णालयात दाखल असलेल्या विजय खरात यांना मारहाण करणारे संबंधित व्यक्ती रुग्णालयातही आले आणि जीवे मारण्याची धमकी दिल्याचे पीडिताकडून सांगण्यात आले. “खून करणारे सुटून येतात, ॲट्रॉसिटीने काही फरक पडत नाही,” अशा स्वरूपाची धमकी दिल्याचेही पीडिताने सांगितले. (Vegetable Vendor Assault)
Also Read : आमदार संतोष बांगरांवर कारवाई करा; हिंगोलीत शाळांमधील कावड यात्रेच्या प्रचारावरून सम्यक विद्यार्थी आंदोलन आक्रमक
रुग्णालयात घडलेल्या या प्रकाराचे सीसीटीव्ही फुटेज उपलब्ध असल्याचे पीडिताच्या नातेवाईकांकडून सांगण्यात आले आहे. त्यामुळे पोलिसांनी रुग्णालयातील सीसीटीव्ही फुटेज तपासून संबंधित व्यक्तींवरही कारवाई करावी, अशी मागणी होत आहे. घटनेची माहिती मिळताच परभणीतील वंचित बहुजन आघाडीच्या पदाधिकाऱ्यांनी जिल्हा सामान्य रुग्णालयात जाऊन विजय खरात यांची भेट घेतली. यावेळी त्यांनी घटनेची संपूर्ण माहिती जाणून घेतली.
ही घटना परभणी ग्रामीण पोलीस ठाण्याच्या हद्दीत घडली आहे. मारहाण, जातीवाचक शिवीगाळ आणि जीवे मारण्याची धमकी या आरोपांप्रकरणी पोलिसांनी उपलब्ध सीसीटीव्ही फुटेज व इतर पुराव्यांची सखोल तपासणी करून दोषींवर कठोर कायदेशीर कारवाई करावी, अशी मागणी वंचित बहुजन आघाडीच्या पदाधिकाऱ्यांनी केली आहे. (Vegetable Vendor Assault)
