परभणी : जिल्हा परिषद आणि पंचायत समिती निवडणुकीच्या पार्श्वभूमीवर परभणी जिल्ह्यातील राजकीय वातावरण तापू लागले आहे. ताडकळस येथे वंचित बहुजन आघाडीच्या उमेदवारांच्या प्रचारार्थ भव्य प्रचार दौरा आणि जाहीर सभेचे आयोजन करण्यात आले होते. या सभेला वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी प्रमुख उपस्थिती लावली.
सभेला संबोधित करताना ॲड. प्रकाश आंबेडकर यांनी प्रस्थापित राजकीय पक्षांवर जोरदार निशाणा साधला. ते म्हणाले की, “वर्षानुवर्षे सत्तेत राहिलेल्यांनी सामान्यांच्या प्रश्नांकडे दुर्लक्ष केले आहे. आता वेळ आली आहे की, वंचित आणि उपेक्षितांनी आपली सत्ता स्वतः निर्माण करावी.” जिल्हा परिषद आणि पंचायत समितीच्या माध्यमातून स्थानिक विकास पोहचवण्यासाठी वंचित बहुजन आघाडी हाच एकमेव पर्याय असल्याचे त्यांनी यावेळी नमूद केले.
सभेला उपस्थित असलेल्या विशाल जनसमुदायाला मार्गदर्शन करताना आंबेडकरांनी शिक्षण, आरोग्य आणि शेती प्रश्नांवर भर देण्याचे आश्वासन दिले.
या सभेला जिल्हाध्यक्ष, स्थानिक पदाधिकारी आणि मोठ्या संख्येने कार्यकर्ते उपस्थित होते. या प्रचार दौऱ्यामुळे ताडकळस गटात वंचित बहुजन आघाडीने आपली पकड मजबूत केल्याचे चित्र दिसत आहे.
