Mirabai Chanu, Commonwealth Games 2026 : भारताची स्टार वेटलिफ्टर मीराबाई चानू हिने कॉमनवेल्थ गेम्स 2026 मध्ये पुन्हा एकदा दमदार कामगिरी करत देशाला पहिले सुवर्णपदक मिळवून दिले. महिलांच्या 48 किलो वजनी गटात तिने एकूण 190 किलो (स्नॅच 85 किलो + क्लीन अँड जर्क 105 किलो) वजन उचलत सुवर्णपदकावर नाव कोरले. या विजयासह मीराबाईने कॉमनवेल्थ स्पर्धेच्या इतिहासात सलग तिसरे सुवर्णपदक जिंकण्याचा पराक्रम केला.
याआधी तिने 2018 च्या गोल्ड कोस्ट आणि 2022 च्या बर्मिंघम कॉमनवेल्थ गेम्समध्येही भारतासाठी सुवर्णपदक जिंकले होते. आता ग्लासगोमध्येही विजेतेपद कायम राखत तिने आपल्या सातत्यपूर्ण उत्कृष्ट कामगिरीची छाप पाडली आहे.
स्पर्धेच्या स्नॅच प्रकारात सुरुवातीचा प्रयत्न अपयशी ठरला असला तरी मीराबाईने जबरदस्त पुनरागमन केले. दुसऱ्या प्रयत्नात 82 किलो वजन उचलल्यानंतर तिने तिसऱ्या प्रयत्नात 85 किलो वजन उचलून नवा स्पर्धा विक्रम प्रस्थापित केला. त्यानंतर क्लीन अँड जर्कमध्ये 105 किलो वजन सहज उचलत तिने सुवर्णपदक निश्चित केले.
एकूण 190 किलो वजन उचलून मीराबाईने प्रतिस्पर्ध्यांना मागे टाकत भारताच्या पदक खात्याची सुवर्ण सुरुवात केली. तिच्या या ऐतिहासिक यशामुळे भारतीय वेटलिफ्टिंगला पुन्हा एकदा जागतिक स्तरावर नवी उंची मिळाली असून, देशभरातून तिच्यावर अभिनंदनाचा वर्षाव होत आहे.
