मुंबई : माजी मुख्यमंत्री एकनाथ शिंदे यांच्यावर एक विडंबनात्मक गीत गायल्याप्रकरणी आज कॉमेडियन कुणाल कामरा विधान भवनाच्या हक्कभंग समितीसमोर हजर झाले. मात्र, या प्रकरणातील मूळ तक्रारदार भाजप नेते प्रवीण दरेकर अनुपस्थित राहिल्याने आता या प्रकरणाची पुढील सुनावणी १० मार्च रोजी होणार आहे.
नेमका वाद काय?
कुणाल कामरा याने एका स्टुडिओमध्ये ‘ठाणे की रिक्षा, चेहरे पे दाढी’ अशा आशयाचे एक गीत गायले होते. हेच गीत सुषमा अंधारे यांनी सोशल मीडियावर शेअर केले होते. या गीतामुळे मुख्यमंत्र्यांचा अवमान झाल्याचा दावा करत प्रवीण दरेकर यांनी दोघांविरुद्ध हक्कभंग प्रस्ताव मांडला होता. (Kunal Kamra song controversy )
मी संविधानाला मानतोय. आज हक्कभंग समितीसमोर आलो होतो, पण आज सुनावणी झाली नाही. पुढच्या सुनावणीलाही येईन. माझ्यावर जो आरोप ठेवण्यात आला आहे त्यावर मी त्यावेळी उत्तर देईन असे कॉमेडियन कुणाल कामरा म्हणाले. यामधील मूळ तक्रारदार प्रवीण दरेकर यांची साक्ष पहिल्यांदा नोंवदली पाहिजे. त्यानंतर आमची बाजू मांडण्यात येईल. आज आमची बाजू का ऐकली नाही याचं उत्तर समिती देईल. (Kunal Kamra song controversy)
हक्कभंग समितीचे अध्यक्ष प्रसाद लाड यांनी स्पष्ट केले की, कायद्याच्या तरतुदीनुसार तक्रारदाराची साक्ष आधी होणे आवश्यक आहे. १० मार्च रोजी प्रवीण दरेकर, कुणाल कामरा आणि सुषमा अंधारे या तिघांनाही आमने सामने बोलावून त्यांची साक्ष नोंदवण्यात येईल.
