Gold Price Today: सोने खरेदी करण्याचा विचार करत असलेल्या ग्राहकांसाठी महत्त्वाची बातमी आहे. २८ ऑक्टोबर रोजी देशातील प्रमुख शहरांमध्ये सोन्याच्या दरात वाढ नोंदवण्यात आली आहे. दिल्लीमध्ये २४ कॅरेट सोन्याचा दर प्रति १० ग्रॅम १,४३,४५० रुपयांवर पोहोचला असून, २२ कॅरेट सोन्यासाठी १,३१,५१० रुपये मोजावे लागत आहेत. दुसरीकडे, सोन्याच्या किमती वाढत असताना चांदीच्या दरातील घसरण कायम आहे.
दिल्लीमध्ये सोन्याचे दर सर्वाधिक
दिल्लीतील सराफा बाजारात एक दिवस आधी सोन्याच्या दरात ५०० रुपयांची घसरण झाली होती. मात्र, त्यानंतर बाजारात पुन्हा तेजी दिसून आली आहे. सणासुदीच्या काळात सोने खरेदी करणाऱ्या ग्राहकांना या वाढलेल्या दरांचा फटका बसण्याची शक्यता आहे.
मनीकंट्रोलच्या माहितीनुसार, २८ ऑक्टोबर रोजी मुंबई, कोलकाता, चेन्नई, पुणे आणि बंगळुरू या शहरांमध्ये सोन्याचे दर पुढीलप्रमाणे आहेत.
– २४ कॅरेट सोने: प्रति १० ग्रॅम १,४३,३०० रुपये
– २२ कॅरेट सोने: प्रति १० ग्रॅम १,३१,३६० रुपये
दिल्लीच्या तुलनेत या शहरांमध्ये सोन्याचे दर किंचित कमी आहेत. मात्र, हे दर बाजारातील उपलब्ध माहितीनुसार असून प्रत्यक्ष खरेदीच्या वेळी स्थानिक सराफानुसार किमती बदलू शकतात. त्याशिवाय, जीएसटी आणि घडणावळ शुल्कामुळे दागिने खरेदी करण्याचा एकूण खर्च वाढू शकतो.
सोन्याच्या दरात तेजी असताना चांदीच्या बाजारात मात्र घसरणीचे चित्र आहे. २८ ऑक्टोबर रोजी सकाळी चांदीचा भाव प्रति किलो २,१९,९०० रुपये होता. त्याच्या आदल्या दिवशी दिल्लीतील सराफा बाजारात चांदीच्या दरात तब्बल ४,००० रुपयांची घसरण झाली होती.
यंदा जानेवारी महिन्यात चांदीच्या दराने प्रति किलो ४ लाख रुपयांचा विक्रमी टप्पा गाठला होता. मात्र, त्यानंतरच्या काळात किमतीत घसरण होताना दिसत आहे. आंतरराष्ट्रीय बाजारात चांदीचा भाव प्रति औंस ५४.२० डॉलर नोंदवण्यात आला आहे. देशांतर्गत आणि आंतरराष्ट्रीय बाजारातील घडामोडींनुसार सोन्या-चांदीच्या किमतीत चढ-उतार होऊ शकतात.
