दिल्ली हादरली! पालम येथील इमारतीला भीषण आग; एकाच कुटुंबातील ९ जणांचा होरपळून मृत्यू

दिल्ली : दिल्लीतील पालम परिसरात बुधवारी सकाळी एक भीषण दुर्घटना घडली. एका बहुमजली इमारतीत लागलेल्या भीषण आगीत एका संपूर्ण कुटुंबाचा मृत्यू झाला. या घटनेत त्या कुटुंबातील तीन लहान मुलांसह एकूण 9 जणांचा मृत्यू झाला, तर आणखी तीन जण गंभीररीत्या भाजले गेले. आग इतकी भीषण होती की, काही लोकांनी आपले जीव वाचवण्यासाठी इमारतीवरून उडी मारली. या घटनेनंतर अग्निशमन दल, पोलिस आणि बचाव पथकांनी तासन्तास प्रयत्न करून आगीवर नियंत्रण मिळवले.

या भीषण दुर्घटनेची माहिती पालम गाव पोलीस ठाण्याला सकाळी सुमारे 7:04 वाजता मिळाली. या घटनेमुळे परिसरातील लोक घाबरलेले होते आणि इमारतीतून दाट धूर निघत होता. पोलिसांनी लगेचच परिसर रिकामा करण्यास सुरुवात केली. (Delhi building Fire)

मिळालेल्या माहितीनुसार, ज्या इमारतीत आग लागली ती पाच मजली होती आणि ती एका गजबजलेल्या भागात होती. भुईमजल्यावर आणि पहिल्या मजल्यावर कपडे आणि कॉस्मेटिक्सचे शोरूम होते. तर दुसऱ्या आणि तिसऱ्या मजल्यावर शोरूमचे मालक राजेंद्र कश्यप यांचे कुटुंब राहत होते. आग लागल्यानंतर वरच्या मजल्यांवर अडकलेल्या लोकांना बाहेर पडण्यासाठी कोणताही मार्ग नव्हता.

या हृदयद्रावक घटनेत एका कुटुंबातील 9 जणांचा मृत्यू झाला. रुग्णालयात नेण्यात आलेल्या सर्वांना डॉक्टरांनी मृत घोषित केले. मृतांमध्ये 15 वर्षे, 6 वर्षे आणि 3 वर्षे वयाच्या तीन चिमुकल्या मुलींचाही समावेश आहे. कुटुंबातील जवळपास सर्व सदस्य आगीत सापडले होते. या घटनेमुळे संपूर्ण परिसर हादरला आहे. (Delhi building Fire)

पोलिसांनी मृतांची ओळख प्रवेश (33), कमल (39), आशू (35), लाडो (70), हिमांशी (22), दीपिका (28) आणि तीन अल्पवयीन मुली अशी केली आहे. हे सर्व एकाच कुटुंबातील होते. एकाच वेळी इतक्या लोकांचा मृत्यू झाल्याने नातेवाईक आणि परिसरात शोककळा पसरली आहे. या घटनेनंतर कुटुंबात हळहळ व्यक्त होत आहे.

आग इतकी भीषण होती की, काही लोकांनी जीव वाचवण्यासाठी इमारतीवरून उडी मारली. दोन जण खाली उडी मारल्याने ते गंभीर जखमी झाले. या घटनेत तीन जण जखमी झाले आहेत. अनिल (32) आणि दोन वर्षांची एक मुलगी यांच्यावर उपचार सुरू आहेत. तर सचिन (29) यांना सुमारे 25 टक्के भाजल्याच्या जखमा झाल्या असून त्यांच्यावर सफदरजंग रुग्णालयात उपचार सुरू आहेत. (Delhi building Fire)

आगीवर नियंत्रण मिळवण्यासाठी सुमारे 30 अग्निशमन गाड्या घटनास्थळी पाठवण्यात आल्या. तसेच 11 रुग्णवाहिका तैनात करण्यात आल्या. सध्या आगीचे नेमके कारण समोर आलेले नाही. पोलिसांनी संपूर्ण परिसर सील करून फॉरेन्सिक टीमला तपासासाठी बोलावले आहे.