ग्लासगो : कॉमनवेल्थ गेम्स २०२६ मध्ये भारतीय खेळाडूंची पदकांची लय कायम असून, महिला वेटलिफ्टर ज्ञानेश्वरी यादव हिने भारताच्या पदकतालिकेत आणखी एका पदकाची भर घातली आहे. ५३ किलो वजनी गटात शानदार कामगिरी करत तिने रौप्यपदक पटकावले आणि भारताला स्पर्धेतील पाचवे पदक मिळवून दिले.
स्पर्धेदरम्यान ज्ञानेश्वरीने स्नॅचमध्ये ८८ किलो तर क्लीन अँड जर्कमध्ये १११ किलो वजन उचलत एकूण १९९ किलो वजन उचलण्याची उल्लेखनीय कामगिरी केली. तिच्या सातत्यपूर्ण आणि आत्मविश्वासपूर्ण प्रदर्शनामुळे तिने रौप्यपदकावर आपले नाव कोरले.
ज्ञानेश्वरी यादव ही छत्तीसगडमधील राजनंदनगाव येथील राहणारी असून २०२३ च्या कॉमनवेल्थ वेटलिफ्टिंग अजिंक्यपद स्पर्धेत तिने ज्युनिअर आणि सिनिअर अशा दोन्ही गटांत सुवर्णपदक जिंकून आपली ताकत सिद्ध केली होती. यंदाच्या ग्लासगो स्पर्धेत सुवर्णपदक थोडक्यात हुकले असले, तरी रौप्यपदक जिंकत ज्ञानेश्वरीने पुन्हा एकदा भारताचा तिरंगा अभिमानाने फडकावला.
