लखनऊ : लखनऊ आणि अयोध्यासह राज्यातील तब्बल १८ जिल्ह्यांतील न्यायालयांना सोमवारी (दि.१६) ईमेलद्वारे बॉम्बस्फोटाची धमकी देण्यात आली आहे. धक्कादायक बाब म्हणजे गेल्या शुक्रवारीही असाच प्रकार घडला होता, त्यानंतर आज पुन्हा दुसऱ्यांदा आलेल्या ईमेलमुळे सुरक्षा यंत्रणांची झोप उडाली आहे.
सोमवारी सकाळी एका अज्ञात व्यक्तीकडून दोन वेळा ईमेल पाठवण्यात आले. पहिला इमेल सकाळी ११:१५ वाजता देण्यात आला, तर दुसऱ्या ईमेलमध्ये दुपारी १२:१५ वाजता आला. या माहितीमुळे न्यायालय परिसरात खळबळ उडाली आहे. (Uttarpradesh Bomb Threat Email)
माहिती मिळताच, वजीरगंज पोलिस स्टेशन आणि एटीएसने लखनऊ न्यायालयाला वेढा घातला. सध्या संपूर्ण परिसराची झडती घेतली जात आहे. वजीरगंज पोलिस स्टेशनसह सर्व १८ प्रभावित जिल्ह्यांमध्ये अज्ञात व्यक्तींविरुद्ध एफआयआर दाखल करण्यात आला आहे. या प्रकरणाचे गांभीर्य ओळखून राज्य सरकारने तपास उत्तर प्रदेश एटीएस (ATS) कडे सोपवला आहे. (Uttarpradesh Bomb Threat Email)
बॉम्बच्या धमकीची माहिती मिळताच, पोलीस प्रशासन घटनास्थळी पोहोचले. सर्व न्यायालय परिसर तात्काळ रिकामा करण्यात आला. तसेच सुरक्षा वाढवण्यात आली आणि कडक तपासणी सुरू करण्यात आली. बॉम्ब पथके आणि श्वान पथके देखील घटनास्थळी दाखल झाली आहेत आणि सर्व न्यायालय परिसराची तपासणी करत आहेत.
