औरंगाबाद : फुले-शाहू-आंबेडकरवादी विचारांच्या Gen Z पिढीशी थेट संवाद साधण्यासाठी ‘जय भीम Gen Z’ या अभिनव उपक्रमाचे आयोजन वंचित बहुजन आघाडीकडून करण्यात आले आहे. या टाउनहॉलमध्ये SC, ST, OBC विद्यार्थ्यांसोबत हक्क-अधिकार, शिक्षण, रोजगार, सामाजिक विषमता, आरक्षण तसेच विविध सामाजिक आणि राजकीय प्रश्नांवर सुजात आंबेडकर यांच्याशी थेट संवाद साधता येणार आहे.
आतापर्यंत ज्या ज्वलंत प्रश्नांवर बोलण्यास किंवा चर्चा करण्यास टाळाटाळ करण्यात आली, अशा प्रश्नांवरही या संवादात मोकळेपणाने चर्चा होणार आहे. Gen Z मधील युवकांना आपले प्रश्न थेट सुजात आंबेडकर यांच्यासमोर मांडता येणार असून, त्या प्रश्नांची उत्तरेही त्यांना थेट मिळणार आहेत.
औरंगाबादमध्ये आयोजित करण्यात आलेल्या या अभिनव उपक्रमासाठी आतापर्यंत 2 हजार विद्यार्थ्यांनी नोंदणी केली आहे. संत एकनाथ रंगमंदिर उस्मानपुरा औरंगाबाद येथे दिनांक 29 सप्टेंबर रोजी सायंकाळी 6 वाजता ‘जय भीम Gen Z’ टाउन हॉल आयोजित करण्यात आला आहे. वेळेत नोंदणी केलेल्या Gen Z आणि विद्यार्थ्यांनी कार्यक्रमाला उपस्थित राहावे, असे आयोजक समितीने आवाहन केले आहे.
Gen Z च्या प्रश्नांवर थेट संवाद –
Gen Z ही पिढी पेपरफुटी, बेरोजगारी, शिक्षण, जातीय विषमता, आरक्षण, हक्क-अधिकार आणि सरकारची जबाबदारी अशा विविध मुद्द्यांवर प्रश्न उपस्थित करत आहे. या प्रश्नांसोबतच Gen Z च्या आकांक्षा, सामाजिक आणि राजकीय जाणीवा तसेच आजच्या बदलत्या परिस्थितीवरही या टाउन हॉलमध्ये चर्चा करण्यात येणार आहे.
‘जय भीम Gen Z’ हा केवळ एक कार्यक्रम नसून, प्रश्न विचारणाऱ्या, आपले मत मांडणाऱ्या आणि सामाजिक संवाद साधणाऱ्या फुले-शाहू-आंबेडकरवादी Gen Z पिढीसाठी एक संवादाचे विचारपीठ म्हणून हा उपक्रम आयोजित करण्यात आला आहे.
