अकोला : महानगरपालिका निवडणुकीच्या पार्श्वभूमीवर वंचित बहुजन आघाडीच्या उमेदवारांच्या प्रचारार्थ पक्षाच्या राष्ट्रीय नेत्या प्रा. अंजलीताई आंबेडकर यांची न्यू तापडिया नगर, मुख्य रोड, अकोला येथे जाहीर प्रचार सभा उत्साहात पार पडली. या सभेत मोठ्या संख्येने नागरिक, कार्यकर्ते व पदाधिकारी उपस्थित होते.
यावेळी बोलताना प्रा. अंजलीताई आंबेडकर यांनी अकोला शहराच्या सर्वांगीण विकासासाठी वंचित बहुजन आघाडीला एक संधी देण्याचे आवाहन केले. अकोला शहर स्वच्छ व सुंदर करण्यासाठी ठोस नियोजन, प्रभावी अंमलबजावणी आणि पारदर्शक प्रशासनाची गरज आहे. शहरातील गटार व्यवस्था, रस्त्यांची दुरवस्था, अपुऱ्या आरोग्य सुविधा तसेच महानगरपालिकेच्या शाळांचा खालावलेला दर्जा सुधारण्यासाठी वंचित बहुजन आघाडी कटिबद्ध आहे, असे त्या म्हणाल्या.
शहरातील सामान्य नागरिकांच्या मूलभूत प्रश्नांकडे आजपर्यंत सत्ताधाऱ्यांनी दुर्लक्ष केल्याचा आरोप करत त्यांनी सांगितले की, महानगरपालिकेत वंचित बहुजन आघाडीचे सक्षम आणि प्रामाणिक प्रतिनिधी निवडून दिल्यास शहराच्या विकासाला नवी दिशा मिळेल. भ्रष्टाचारमुक्त कारभार, दर्जेदार नागरी सुविधा आणि सर्वसामान्यांच्या हिताचे निर्णय घेणे हे आमचे प्रमुख उद्दिष्ट आहे.
या प्रचार सभेला वंचित बहुजन आघाडीच्या राष्ट्रीय कार्यकारिणी सदस्य अरुंधती शिरसाठ, राज्य उपाध्यक्ष धैर्यवर्धन पुंडकर तसेच ज्ञानेश्वर सुलताने यांची प्रमुख उपस्थिती होती. यावेळी उपस्थित मान्यवरांनीही अकोला शहराच्या विकासासाठी वंचित बहुजन आघाडीच्या उमेदवारांना मतदान करण्याचे आवाहन केले.
सभा उत्स्फूर्त प्रतिसादात पार पडली असून, येणाऱ्या महानगरपालिका निवडणुकीत वंचित बहुजन आघाडी मोठी बाजी मारण्याची चर्चा नागरिकांकडून होत आहे.
