रशियाच्या कामचात्का प्रदेशात शक्तिशाली भूकंपांचे धक्के, त्सुनामीचा इशारा जारी

‎मॉस्को : रशियाच्या पूर्वेकडील कामचात्का प्रदेशाजवळ रविवारी सकाळी भूकंपाचे तीन जोरदार धक्के जाणवले. या धक्क्यांमुळे अमेरिकेच्या भूगर्भीय सर्वेक्षण संस्थेने (USGS) त्सुनामीचा इशारा जारी केला आहे. या भूकंपांपैकी एक भूकंप 7.4 रिश्टर स्केल तीव्रतेचा होता, ज्यामुळे जवळपासच्या 300 किलोमीटर (186 मैल) परिसरात धोकादायक त्सुनामी लाटा येण्याची शक्यता वर्तवण्यात आली आहे.
‎
‎भूकंपाची सविस्तर माहिती
‎
‎सकाळी 8:49 वाजता (स्थानिक वेळेनुसार) 7.4 रिश्टर तीव्रतेचा भूकंप झाला. याआधी 7.0 आणि 6.7 तीव्रतेचे दोन भूकंप झाले होते, मात्र त्यावेळी त्सुनामीचा इशारा देण्यात आला नव्हता. 7.4 तीव्रतेच्या भूकंपाचे केंद्रबिंदू कामचात्का प्रदेशाची राजधानी पेट्रोपावलोव्स्क-कामचात्स्कीच्या पूर्वेस सुमारे 140 किलोमीटर अंतरावर होते. या भूकंपांनंतर अनेक आफ्टरशॉक्सही जाणवले, ज्यात आणखी एक 6.7 तीव्रतेचा भूकंप समाविष्ट होता, असे USGS ने सांगितले.
‎
‎त्सुनामीचा धोका आणि प्रशासनाची तयारी
‎
‎रशियाच्या आपत्कालीन परिस्थिती मंत्रालयाने दिलेल्या माहितीनुसार, बियरिंग समुद्राच्या दक्षिण-पश्चिमेकडील कमांडर आयलंड्समध्ये 60 सेंटीमीटरपर्यंतच्या लाटा येण्याची शक्यता आहे, तर कामचात्का द्वीपकल्पात 15 ते 40 सेंटीमीटर उंचीच्या लाटा येऊ शकतात. सध्या तरी कोणतीही जीवितहानी किंवा मोठ्या नुकसानीची नोंद झालेली नाही.
‎
‎जर्मन रिसर्च सेंटर फॉर जिओसाइंसेस (GFZ) ने देखील कामचात्काच्या किनाऱ्यालगत 6.5 पेक्षा अधिक तीव्रतेचे दोन भूकंप झाल्याची नोंद केली आहे, ज्यांची तीव्रता अनुक्रमे 6.6 आणि 6.7 होती. या दोन्ही भूकंपांचे केंद्र सुमारे 10 किलोमीटर (6 मैल) खोलीवर होते.
‎
‎कामचात्का भूकंपासाठी संवेदनशील का?
‎
‎कामचात्का द्वीपकल्प पॅसिफिक आणि नॉर्थ अमेरिकन टेक्टॉनिक प्लेट्सच्या संगमावर वसलेले असल्यामुळे हा भाग भूकंपाच्या दृष्टीने अत्यंत संवेदनशील मानला जातो. 1900 पासून या प्रदेशात 8.3 किंवा त्याहून अधिक तीव्रतेचे सात मोठे भूकंप झाले आहेत. 4 नोव्हेंबर 1952 रोजी कामचात्कामध्ये 9.0 तीव्रतेचा भूकंप झाला होता, ज्यामुळे हवाई बेटांवर तब्बल 9.1 मीटर (30 फूट) उंच लाटा उसळल्या होत्या. त्यावेळी कोणतीही जीवितहानी झाली नसली तरी काही प्रमाणात नुकसान झाले होते. सध्याच्या भूकंपात अमेरिकेच्या भूभागाला त्सुनामीचा कोणताही धोका नाही.
‎