मुंबई – राज्य मंत्रिमंडळाने राज्यातील मद्याच्या किंमती वाढवण्याचा निर्णय घेतला आहे. राज्यसरकारने महसूल उत्पादन वाढवण्यासाठी हा निर्णय घेतला असल्याचे सांगितले आहे. राज्याच्या महसुलात वाढ करण्यासाठी राज्य उत्पादन शुल्क विभागाने मद्यविक्रीवरील करामध्ये मोठी वाढ करण्याचा निर्णय घेतला. त्यामुळे राज्यातील देशी-विदेशी मद्य महाग होणार आहे. राज्य सरकारच्या कर वाढिच्या या निर्णयामुळे देशी-विदेशी दारुच्या किंमतीत मोठी वाढ होणार असून मद्यांच्या दरात सरासरी ९ ते ७० टक्के वाढ पहायला मिळणार आहे.
राज्य मंत्रिमंडळ बैठकीत दारु विक्रीवर कर वाढविण्याचा निर्णय घेण्यात आला आहे. त्यामुळे आता मद्यप्रेमींच्या खिशाला झळ बसणार आहे. राज्य शासनाच्या या निर्णयामुळे राज्याच्या तिजोरीत तब्बल 14,000 कोटींचा महसूल वाढणार असल्याचे उत्पादन शुल्क विभागने म्हटले आहे. त्यामुळे आता मद्यपींना 180 मिलीच्या एका क्वार्टरसाठी 80 ते 360 रुपये मोजावे लागणार आहेत. देशी दारु 80 रुपयांना 180 मिली मिळणार आहे. तर, विदेशी दारू 180 मिली ही 360 रुपयांना मिळणार आहे.
राज्याच्या महसुलात वाढ करण्यासाठी राज्य उत्पादन शुल्क विभागाने मद्यविक्रीवरील कर वाढविण्याचा निर्णय घेतला आहे. भारतीय बनावटीच्या विदेशी मद्यावर कर वाढविण्यात आला आहे. त्यासह, विदेशी मद्यावरही हा कर वाढविण्यात आल्याने आता मद्यप्रेमींसाठी हा निर्णय खिशाला झळ देणारा ठरणार आहे.
