मुंबई – सध्या अमेरिकेच्या राष्ट्रध्यक्ष डोनाल्ड ट्रम्प आणि उद्योग जगतातील एक मोठ नाव एलॉन मस्क यांच्यात सोशल मिडियाच्या माध्यमातून शाब्दीक चकमक सुरू आहे. एकेकाळचे जवळचे सहकारी असलेले डोनाल्ड ट्रम्प व एलॉन मस्क यांच्यातील या भांडणामुळे अवघ्या जगाचे लक्ष अमेरिकेतील या राजकीय घडामोडीकडे लागले आहे. हे भांडण सर्वात श्रीमंत व्यक्ती एलॉन मस्क आणि जगातील सर्वात शक्तिशाली राजकारणी डोनाल्ड ट्रम्प या दोघांमध्ये सुरु आहे.
डोनाल्ड ट्रम्प आणि इलॉन मस्क यांच्यातील संघर्ष नेमका काय आहे
डोनाल्ड ट्रम्प आणि इलॉन मस्क हे दोन्हीही प्रचंड प्रभावशाली अशी व्यक्तिमत्त्वं आहेत, डोनाल्ड ट्रम्प यांच्या सरकारमध्ये मस्क हे सरकारी अधिकारी होते त्यांनी 130 दिवस सोबत काम केले. मस्क यांनी अमेरिकेच्या निवडणूकीत ट्रम्प यांना पाठिंबा व आर्थिक मदत केली होती. मात्र सध्या मस्क हे अमेरिकन सरकारमधून राजिनामा देऊन बाहेर पडले आहेत. त्यांनतर त्यांनी ट्रम्प सरकारच्या धोरणांवर टिका करायला सुरुवात केली आणि या दोंघामधला वाद हळुहळु वाढत गेला.
विशेष म्हणजे या दोघांकडेही स्वत:च्या मालकीचे सोशल मीडिया प्लॅटफॉर्म्स आहेत. डोनाल्ड ट्रम्प यांच्याकडे ‘ट्रुथ सोशल’ आहे, तर इलॉन मस्क यांच्याकडे ‘एक्स’ हा सोशल मीडिया प्लॅटफॉर्म आहे. दोघेही आपापल्या सोशल मीडिया प्लॅटफॉर्मचा वापर करुन एकमेकांवर कोरडे आसूड ओढत आहेत. मात्र, त्यांच्यातील मतभेदांचं आता एकप्रकारे शाब्दिक युद्धात रुपांतरण झालं आहे.
