आदिवासी गोवारी समुदायाचा विदर्भस्तरीय मेळावा संपन्न
नागपूर – माना आदिवासी समाजाप्रमाणेच स्वतःचा प्रतिनिधि निवडून द्यावा व स्वतःच्या समस्या स्वतःच सोडवाव्यात. आपल्या समाजाचे प्रतिनिधीच आपले प्रश्न सोडवू शकतात. आरक्षणाचा प्रश्न सोडवायचा असेल तर आपल्या समाजाचे प्रतिनिधी विधानसभेत पाठविण्याची गरज आहे. त्यामुळे गोवारी समाजाने त्यांचा आरक्षणाचा प्रश्न सोडविण्यासाठी निवडणुकीतून एकजुटता दाखवावी, असे आवाहन वंचित बहुजन आघाडीचे राष्ट्रीय अध्यक्ष ॲड. प्रकाश आंबेडकर यांनी येथे केले.
‘अन्यायग्रस्त आदिवासी गोवारी समुदायाचा विदर्भस्तरीय भव्य मेळावा’ पासपोर्ट कार्यालयाजवळ न्यू मानकापूर येथे आयोजित करण्यात आला होता. त्यावेळी मार्गदर्शन करतांना ते बोलत होते. यावेळी माजी राज्यमंत्री डॉ. रमेश गजबे, कुशलभाऊ मेश्राम, अखिल भारतीय आदिवासी गोवारी शक्ती संघाचे अध्यक्ष भगवान भोंडे, राजूभाऊ लोखंडे, रवीभाऊ शेंडे, अरविंद सांदेकर, विलास वाटकर, राहुल वानखेडे प्रामुख्याने उपस्थित होते.
ॲड. बाळासाहेब आंबेडकर म्हणाले, गोवारी समाजाने आपल्या आरक्षणाच्या प्रश्नासाठी संघर्ष केला. लाखोंचा मोर्चा काढला. याच नागपुरात काढलेल्या मोर्चात शेकडो समाजबांधव शहीद झाले. या घटनेची तीव्रता लक्षात यावी म्हणून मखराम पवार यांनी आपल्या आमदारकीचा राजीनामा दिला. परंतु, सरकारने तेव्हा त्या घटनेची पाहिजे तशी दखल घेतली नव्हती. माना समाजाचाही तोच विषय होता. परंतु त्यांचा प्रश्न मार्गी लागला. गोवारी समाजाचा का नाही? कारण माना समाजाने सामूहीकपणे निर्णय घेतला. आपला प्रतिनिधी निवडून दिला. गोवारी समाजानेही तसाच सामूहिक निर्णय घेण्याची गरज असल्याचे त्यांनी सांगितले.
या कार्यक्रमाचे सुत्रसंचालन अजय सहारे, प्रस्तावना नंदू साहारे व आभार प्रदर्शन सरला चचान यांनी केले.
गोवारी समाजाच्या मेळाव्याला जाण्या अगोदर आदरणीय बाळासाहेब आंबेडकर यांनी नागपूरच्या झिरो माईल स्थित शहिद गोवारी स्मारक येथे जावून १९९४ मध्ये शहिद झालेल्या ११४ गोवारी बांधवांना श्रध्दांजली अर्पन केली.
