मुंबई : IIT बॉम्बेशी संबंधित साहिल वाकोडे यांच्या मृत्यूच्या प्रकरणात वंचित बहुजन आघाडीचे युवा नेते सुजात आंबेडकर यांनी संस्थेच्या भूमिकेवर प्रश्न उपस्थित केले आहेत. सुजात आंबेडकर यांनी ‘एक्स’वर पोस्ट करत म्हटले आहे की, IIT बॉम्बे ही कोणतीही तपास यंत्रणा नाही. असे असतानाही कोणत्याही स्वतंत्र चौकशीपूर्वीच संस्थेकडून सार्वजनिक निवेदन जारी करून विद्यार्थ्याच्या मृत्यूचा कथित परीक्षेतील गैरप्रकाराशी संबंध जोडणे हे संस्थात्मकदृष्ट्या चुकीचे होते.
सुजात आंबेडकर यांनी म्हटले की, घाईघाईने आणि स्वतंत्र चौकशी न करताच तयार करण्यात आलेल्या अधिकृत कथनामुळे तथ्यांबाबत आधीच एक धारणा निर्माण होते आणि मृत विद्यार्थ्याच्या नावाला सार्वजनिक पातळीवर बदनाम होण्याचा धोका निर्माण होतो. संस्थेच्या निवेदनानंतर माध्यमे आणि सोशल मीडियातील काही घटकांनी त्यालाच अंतिम सत्य मानले; मात्र निष्पक्ष आणि वेळबद्ध चौकशीची मागणी मागे पडली.
साहिल वाकोडे यांच्या कुटुंबीयांकडून जातीय अपमानाबाबत करण्यात आलेल्या आरोपांचीही निष्पक्ष चौकशी झाली पाहिजे, असे त्यांनी म्हटले आहे. हे आरोप चौकशीशिवाय फेटाळून न लावता संबंधित पुरावे आणि परिस्थितीची तपासणी केली पाहिजे, असे त्यांनी आपल्या पोस्टमध्ये नमूद केले.
याच प्रकरणाच्या पार्श्वभूमीवर सुजात आंबेडकर यांनी आता आक्रमक भूमिका घेतली आहे. उद्या २३ सप्टेंबर रोजी मुंबईतील IIT बॉम्बेला भेट देणार आहेत. २३ सप्टेंबर रोजी दुपारी ४ वाजता ते IIT मुंबईच्या डीन यांना जाब विचारणार आहेत.
साहिल वाकोडे यांना न्याय मिळवून देण्यासाठी स्वतंत्र चौकशी, पुरावे सुरक्षित ठेवणे आणि संस्थात्मक उत्तरदायित्व आवश्यक असल्यावर सुजात आंबेडकर यांनी भर दिला आहे. चौकशीऐवजी परीक्षेतील कथित गैरप्रकाराच्या अटकळींना मुद्दा बनवणे किंवा आरक्षणाला या प्रकरणाचा मुख्य विषय बनवणे योग्य नाही, असे त्यांनी म्हटले आहे.
