नांदेड : ५ मे २०२६ रोजी जारी करण्यात आलेल्या शासन निर्णयातील परिशिष्ट क्रमांक २६ नुसार विविध शासकीय विभागांमधील लघुलेखक (Stenographer) हे पद मृत करण्यात आल्याचे निदर्शनास आले आहे. शासनाच्या या निर्णयामुळे लघुलेखक पदासाठी तयारी करणाऱ्या असंख्य विद्यार्थी आणि बेरोजगार युवकांच्या रोजगाराच्या संधींवर मोठा परिणाम झाला आहे.
लघुलेखक पद पुनर्जीवित करण्यात यावे तसेच विविध शासकीय विभागांमध्ये उपलब्ध असलेल्या १०० टक्के रिक्त जागांची तातडीने पदभरती करण्यात यावी, या मागणीसाठी विद्यार्थी गेल्या सहा दिवसांपासून नांदेड जिल्हाधिकारी कार्यालयासमोर उपोषणाला बसले आहेत.
या विद्यार्थी आंदोलनाला ॲड. बाळासाहेब आंबेडकर आणि सुजात आंबेडकर यांच्या मार्गदर्शनाखाली तसेच प्रदेशाध्यक्ष राजेंद्र पातोडे यांच्या सूचनेनुसार वंचित बहुजन युवा आघाडी महाराष्ट्र राज्याने अधिकृत पाठिंबा जाहीर केला आहे.
शासनाने विद्यार्थ्यांच्या आंदोलनाची तातडीने दखल घेऊन त्यांच्या मागण्यांवर सकारात्मक निर्णय घ्यावा, उपोषणकर्त्या विद्यार्थ्यांच्या प्रश्नांचे तत्काळ निराकरण करावे, तसेच लघुलेखक पद पुनर्जीवित करून विविध शासकीय विभागांमधील १०० टक्के रिक्त पदांची भरती प्रक्रिया तातडीने सुरू करावी, अशी ठाम मागणी वंचित बहुजन युवा आघाडीने केली आहे.
विद्यार्थ्यांच्या न्याय्य हक्कांसाठी सुरू असलेल्या या संघर्षाला वंचित बहुजन युवा आघाडीचा पूर्ण आणि ठाम पाठिंबा असल्याचे पत्र प्रदेश सदस्य अक्षय बनसोडे यांच्या वतीने उपस्थित उपोषणकर्त्या विद्यार्थ्यांना देण्यात आले. यावेळी श्याम कांबळे, युवा दक्षिण महानगराध्यक्ष गोपालसिंग टाक आणि महासचिव शुद्धोधन कापसीकर यांची उपस्थिती होती.
