पनवेल : मंत्रालयाशी संबंधित अधिकाऱ्यांवरील लाचलुचपत कारवायांची मालिका सुरूच असून रविवारी आणखी एका अधिकाऱ्याला रंगेहाथ पकडण्यात आले. अर्थ व नियोजन विभागातील कक्ष अधिकारी विलास लाड याला लाचलुचपत प्रतिबंधक विभागाने (एसीबी) 6 लाख 37 हजार रुपये स्वीकारताना नवी मुंबईतील खारघर परिसरात अटक केली. Bribery Scandal)
गेल्या महिन्यातच नरहरी झिरवाळ यांच्या कार्यालयातील लिपिकाला लाच घेताना पकडण्यात आले होते. त्यानंतर 13 मार्च रोजी कोकण विभाग अनुसूचित जमाती प्रमाणपत्र तपासणी समितीच्या उपसंचालक मिनाक्षी उन्हाळे यांनाही अडीच लाखांची लाच स्वीकारताना ठाणे एसीबीने अटक केली होती. या घटनांच्या पार्श्वभूमीवर ही ताजी कारवाई झाल्याने प्रशासकीय वर्तुळात खळबळ उडाली आहे. (/Bribery Scandal)
मिळालेल्या माहितीनुसार, ग्रामविकास विभागाचा प्रलंबित निधी मंजूर करून देण्यासाठी लाड यांनी संबंधित व्यक्तीकडे मोठ्या रकमेची मागणी केली होती. शासकीय कामासाठी लाचेची मागणी होत असल्याची तक्रार एसीबीकडे दाखल झाल्यानंतर सापळा रचण्यात आला. त्यानुसार खारघर येथे लाच स्वीकारण्यासाठी आलेल्या लाड यांना अधिकाऱ्यांनी रंगेहाथ पकडले. या प्रकरणाचा पुढील तपास सुरू असून मंत्रालयातील वाढत्या लाचलुचपत प्रकरणांमुळे प्रशासनाच्या कार्यपद्धतीवर प्रश्नचिन्ह निर्माण झाले आहे.
