गेवराई : जगदंब शिक्षक प्रसारक मंडळाच्या अंतर्गत येणाऱ्या कैलास बाबुराव उघडे माध्यमिक विद्यालय, उमापुर (सिरसदेवी) येथे कार्यरत असलेले सहशिक्षक कैलास बाबुराव उघडे यांनी 14 मार्च 2026 रोजी राहत्या घरी गळफास घेऊन आत्महत्या केल्याची धक्कादायक घटना समोर आली आहे. पगार थांबवून आर्थिक कोंडी व मानसिक छळ करण्यात आल्याचा आरोप या प्रकरणात करण्यात येत आहे.
मिळालेल्या माहितीनुसार, उघडे यांच्यावर बोरकर व श्रीराम शेळके यांनी पगार रोखून ठेवत मानसिक त्रास दिला होता. या संदर्भात त्यांनी संस्थेच्या सचिवांकडे तक्रार केली होती. मात्र, सचिवांनी जातीय दृष्टिकोनातून दुर्लक्ष केल्याचा आरोप होत असून, यामुळेच आत्महत्येस प्रवृत्त झाल्याचा दावा करण्यात येत आहे.
दरम्यान, या प्रकरणात केवळ दोनच व्यक्तींवर गुन्हा दाखल करण्याचा प्रयत्न होत असल्याची नाराजी व्यक्त होत आहे. प्रत्यक्षात संस्थेच्या मुख्य पदाधिकाऱ्यांची भूमिका संशयास्पद असल्याचा आरोप करत अमरसिंह पंडित व जयसिंह पंडित यांच्यासह संबंधित सर्वांवर आत्महत्येस प्रवृत्त केल्याप्रकरणी व ॲट्रॉसिटी ॲक्ट अंतर्गत गुन्हा दाखल करण्याची मागणी होत आहे.
कैलास उघडे यांचा संघर्षमय प्रवासही समोर आला आहे. 2004 मध्ये त्यांनी शिवाजीराव पंडित कला महाविद्यालयात सेवा सुरू केली. त्यानंतर विविध ठिकाणी काम करत 2010 मध्ये अनुसूचित जाती प्रवर्गातून सहशिक्षक पदावर निवड झाली. मात्र, विनाअनुदानित स्थिती, अपुरा पगार आणि सततची आर्थिक अस्थिरता यामुळे त्यांना इतर ठिकाणीही काम करावे लागले होते.
या घटनेनंतर वंचित बहुजन आघाडीच्या वतीने मृताच्या कुटुंबीयांची भेट घेण्यात आली. पक्षाचे राष्ट्रीय अध्यक्ष अ‍ॅड. प्रकाश (बाळासाहेब) आंबेडकर यांच्या निर्देशानुसार पदाधिकाऱ्यांनी कुटुंबीयांना दिलासा देत न्यायासाठी लढा उभारण्याचा इशारा दिला. यावेळी प्रशांत बोराडे, अजय सरवदे, ज्ञानेश्वर कवठेकर, राजेशकुमार जोगदंड, किशोर भोले यांच्यासह अनेक कार्यकर्ते उपस्थित होते.
या प्रकरणाची सखोल चौकशी करून दोषींवर कठोर कारवाई करण्याची मागणी आता जोर धरत आहे.
