मुंबई : जम्मू आणि काश्मीरच्या पूंछ सेक्टरमध्ये ९ मे २०२५ रोजी सीमेपलीकडून झालेल्या गोळीबारात शहीद झालेले अग्निवीर एम. मुरली नाईक यांच्या कुटुंबाच्या वतीने वंचित बहुजन आघाडीचे राष्ट्रीय अध्यक्ष अ‍ॅड. प्रकाश आंबेडकर यांनी आज मुंबई उच्च न्यायालयात एक महत्त्वाची रिट याचिका दाखल केली आहे. ही याचिका शहीद सैनिकाच्या आई ज्योतिबाई श्रीराम नाईक यांनी वंचित बहुजन आघाडीमार्फत दाखल केली आहे.
याचिकेत म्हटले आहे की, अग्निवीर सैनिक सीमेवर तैनात असतात, ते समान कर्तव्ये पार पाडतात आणि नियमित सैनिकांसारखेच धोके सहन करतात, तरीही त्यांच्या शहीद झाल्यानंतर त्यांच्या कुटुंबांना नियमित सैनिकांसारखेच पेन्शन, कल्याणकारी फायदे आणि कुटुंब संरक्षण योजना दिल्या जात नाहीत. हे भेदभावपूर्ण आणि असंवैधानिक म्हणत न्यायालयाने हस्तक्षेप करण्याची मागणी केली आहे.
याचिकेतील प्रमुख मागण्या अशा आहेत :शहीद अग्निवीर कुटुंबांना नियमित सैनिकांसारखेच मृत्यूनंतरचे फायदे मिळावेत.दीर्घकालीन पेन्शन आणि कुटुंब संरक्षण योजनांमध्ये समावेश.शहीद अग्निवीरांना समान संस्थात्मक मान्यता, आदर आणि कल्याणकारी दर्जा देण्यात यावा.
शहीद मुरली नाईक यांच्या वतीने अ‍ॅड. प्रकाश आंबेडकर हे स्वतः न्यायालयात हजर आहेत. अ‍ॅड. संदेश मोरे, अ‍ॅड. हेमंत घाडीगावकर आणि अ‍ॅड. हितेंद्र गांधी यांनी ही याचिका दाखल केली आहे.
अग्निवीर योजनेअंतर्गत सेवेत शहीद झालेल्या सैनिकांच्या कुटुंबांच्या हक्कांबाबत ही याचिका एक महत्त्वाचा कायदेशीर मुद्दा उपस्थित करते. भविष्यात, देशभरातील इतर अग्निवीर कुटुंबांच्या हक्कांवर आणि लाभ रचनेवर याचा मोठा परिणाम होऊ शकतो.
