वाशिम : स्थानिक स्वराज्य संस्थांच्या निवडणुकांच्या पार्श्वभूमीवर वंचित बहुजन आघाडीच्या नगराध्यक्ष आणि नगरसेवक उमेदवारांच्या प्रचारार्थ आयोजित जाहीर सभा कारंजा येथे पार पडली. वंचित बहुजन आघाडीचे नगराध्यक्ष उमेदवार फिरदोस अनम सैय्यद नसिरोद्दिन आणि नगरसेवक उमेदवारांच्या समर्थनार्थ युवा नेते सुजात आंबेडकर यांनी मार्गदर्शन केले.
सभेत बोलताना सुजात आंबेडकर यांनी पारलिंगी समुदाय हा समाजाचा अविभाज्य आणि महत्त्वाचा घटक असल्याचे सांगितले. तसेच स्थानिक स्तरापासून ते विधानसभेपर्यंत वंचित बहुजन आघाडीने या समुदायाला प्रतिनिधित्व दिल्याचे ते म्हणाले. कारंजा नगरपरिषद निवडणुकीत श्रावणी मधुकर हिंगासपुरे या पारलिंगी उमेदवार मैदानात असून, त्यांच्या उमेदवारीचे महत्त्वही त्यांनी अधोरेखित केले.
यावेळी आंबेडकर यांनी पक्षाच्या नगराध्यक्ष तसेच नगरसेवक उमेदवारांना मतदारांनी सकारात्मक प्रतिसाद देण्याचे आवाहन केले. वंचित बहुजन आघाडी हा जनतेच्या प्रश्नांसाठी लढणारा पक्ष असल्याचेही ते म्हणाले. सभेला मोठ्या संख्येने नागरिक उपस्थित होते.
